Пожарникар спасил 9-месечно бебе, 17 години подоцна повторно се сретнуваат

Пред многу години пожарникарот Мајк Хјуз ја спасил девет месечната Даниела Дејвисон од пожарот кој избувнал во нејзиниот дом. Но, оваа среќна приказна не завршува тука.

„Кога стигнавме до местото на повикот забележавме дека голем дел од куќата е во пламен. Ја најдов Даниела како плаче во креветчето во спалната соба“ – се сеќава Мајк.

После некое време сакал да дознае што се случило со малечкото девојче што го спасил. Ја нашол на Фејсбук оставајќи ѝ порака „Мислам дека еднаш кога беше многу малечка те спасив од пожар“. Од тој момент натаму нивната комуникација не престанала, а Мајк ѝ станал како втор тато на Даниела.

Седумнаесет години по пожарот, таа го поканила Мајк на церемонијата по повод нејзината матура, како човек кој еднаш ѝ го спасил животот и како нејзин близок пријател.

Мајк не можел да ги задржи солзите кога го слушнал нејзиниот говор на церемонијата „Присуството на Мајк е нешто кое ми значи многу. Секогаш ми навираат солзи-радосници кога ќе помислам како можеле да завршат работите. Немаше да стојам овде да не беше ти“. 

М. С. | Црнобело