Во Лондон новогодишниот огномет ќе мириса на јагода, а снегот на праска

За дочекот на новата 2014 година небото над британското кралство ќе биде полно со шарени експлозии, но и со најразлични мириси.

Двајца британски стручњаци по кулинарство Сем Бомпас и Хари Пар одлучиле на лондонците за Нова година да им приредат мултисетилен настан, со снег кој мириса на праска, конфети кои се јадат со вкус на банана и црвен огномет од кој се шири мирис на јагода.

На 31-ви декември, кога ќе се спојат стрелките на полноќ, жителите и посетителите на Лондон кои се собрани по должината на реката Темза, ќе доживеат еден сосем поинаков огномет од досегашните.

Целта на Сем и Хари е новогодишната ноќ да ја исполнат со примамливи мириси на овошје и на посетителите да им приредат искуство кое ќе ги разбуди сите нивни сетила.

„Сфативме дека никој пред нас не се обидел да направи такво нешто и помисливме дека тоа би било генијална идеја“, рекол Сем Бомпас за Дејли Меил, додавајќи дека во проектот се вклучени и пиротехничари, стручњаци за вкусови, музичари, инженери и експерти за безбедност и здравје.

„Низ воздухот ќе лебди портокалов меур од кој при пукањето ќе се шири мирис на портокал. Снегот со мирис на праска ќе паѓа од небото, како и конфетите со вкус на банана“, додал Сем.

Оние кои Новата година ќе ја дочекаат дома, ќе можат целиот спектакл да го следат низ директен пренос на телевизија.

„Лондон ужива во репутацијата на град на креативноста и иновацијата, град кој нуди најнеобични искуства. Новиот начин на новогодишна прослава само ќе ја збогати магијата во таа ноќ“, рекол Борис Џонсон, градоначалникот на Лондон.