Мали интервенции за совршен ентериер

Кој рече дека исклучиво големите промени во домот може да бидат во корист на добриот изглед? Малите интервенции исто така може да го променат вашиот животен амбиент на подобро. Ова се неколку наши предлози:

Нов изглед за спалната соба можете да постигнете со само неколку шарени перници. Користете различни бои и дезени, во зависност од боите кои преовладуваат во вашата соба. Експериментирајте со црно-белите спротивности или пак со различните цветни шари.

Брза промена на тоалетот може да постигнете со неколку метри необичен тапет или налепници. Одберете шара која најмногу ви се допаѓа и поставете ја на впечатливо место. Вашиот тоалет ќе добие сосема нов изглед!

Кога се работи за дневната соба, одберете една нијанса и додадете неколку детали во истата. Сошијте перничиња, купете сувенири во таа нијанса или пак на ѕид закачете едноставна, минималистичка уметност.

Декорацијата со овошје и цвеќе со силни бои е секогаш актуелна, а драстично го менува амбиентот. Ова посебно е добро освежување на белите или сиви простории во кои нема премногу детали.

Истакнете ги шарените чинии во кујната ако сакате да добиете модерен изглед. Можеби ви звучи старомодно, но сепак се одлична декорација која ја разбива монотонијата.