Како типот на кафе ја одредува нашата личност?

Кафе наутро или на пладне? Со пријателите, на работа или како неизбежен ритуал за уживање сами? Со млеко или без, топло и горко или можеби ледено...

...со сладолед? Некои се зависници од голтка кафе со јак вкус, на некои им е неопходно за да го почнат новиот ден, а некои пак го пијат единствено поради социјален момент и дружење.

Честопати не сме ни свесни, но нашиот омилен тип на кафе, како и начинот на кој го пиеме и подготвуваме ја одредува нашата личност. Чист факт. Токму на оваа тема направени се и бројни истражувања, а социолозите и психолозите пак, согласни се: ритуалот на пиење кафе се поврзува со социјалните потреби на личноста.

„Аурата на доброто кафе кај некои луѓе поттикнува чувство на релаксираност, додека пак кај некои други типови е главниот двигател на енергија. Исто така и средината каде што се пие кафето, без разлика дали станува збор за кафуле, дом, канцеларија, е повеќе од само место за пиење кафе. Онаму каде што се пие кафе е всушност заедница отворена за прифаќање нови идеи и култури. Изборот на вкус пак, неретко се поистоветува со нашиот личен животен избор. Сите овие факти, но и многу други индикатори говорат за нашиот карактер, за нашата социјална припадност и потреби“, вели Славе Младеновски, социолог.

Поставете си неколку прашања поврзани со вашите секојдневни активности и ќе се изненадите колку навистина кафето соодветствува со вашиот профил. Или обратно: размислете кои сè чекори ги преземате додека го подготвувате вашето кафе, какви додатоци користите, каде и со кого го пиете и тоа ќе ја дефинира вашата личност.

1. Доколку сакате инстант, или пак мелено кафе, потребно ви е наутро за да ве разбуди, најчесто за време на појадокот, но честопати знаете да го пиете и од навика; доколку сте зависни од силната арома и квалитетниот вкус, уживате во ритуалот на пиење кафе – Вие сте стандарден тип.

Веројатно сте вработени, имате семејство, но сте лојален пријател. Го сакате животот, искрени сте и автентични. Во друштво сте меѓу омилените и наоѓате магија во секој миг.

2. Доколку наутро, дури и пред да појадувате, со полуотворени очи се упатувате кон кујната за да го подготвите вашето прво кафе; доколку вашиот омилен вкус е силно, горко, без речиси никакви додатоци и уживате додека го пиете сами за успешен почеток на новиот ден – Вие сте еднергична личност.

Сакате спорт и забава, амбициозни сте во работата, функционални во одлуките. Честопати преземате иницијатива и ги поттикнувате сите околу вас да го сторат истото. Можеби сакате и да бидете лидер. 

3. Доколку кафето за вас не е приоритет наутро, едноставно можете и без него, но доколку веќе го пиете - тоа не трае повеќе од 5 минути додека се подготвувате за на работа; доколку омилен дел од денот за кафе ви е пладнето за малку дополнителна енергија и го пиете првенствено за социјалниот момент; доколку ставате половина лажичка наместо цела, го сакате слатко, со млеко, а често и ледено – Вие сте мирен тип.

Уживате да сте сами или меѓу најблиските, не секогаш се впуштате во вжештени дискусии,  посветени сте на работата и вредни сте. Сакате добра музика, имате стил, изразена креативност и се грижите за себе.