Павлова торта, Цезар салата - Како изгледале луѓето по кои се наречени популарните јадења?
Иако пицата не била храна за аристократи, во 1889 година, италијанската кралица Маргарита посакала да проба „обична храна“ и побарала да ѝ направат нешто што обичните луѓе го обожавале - така настанала една од најпопуларните светски пици.
Во ресторан порачувате пица Маргарита, Цезар салата или Захер торта... Им го познавате вкусот на овие јадења, ги обожавате и уживате во секој залак.
Но, знаете ли дека некои од најпопуларните јадења го добиле името по вистински личности? Кои се тие и како изгледале?
Цезар салата
Името на популарната салата нема никаква врска со римскиот император Гај Јулиј Цезар, туку е поврзано со италијанскиот готвач Цезар Кардини.
Тој имал мексикански ресторан во САД и подготвувал храна за забава на која имало многу гости.
Кога пред крајот на забавата им снемало храна, Кардини направил салата со неколкуте состојки што во тој момент му се нашле во кујната: ставил зелена салата, јајца, малку пармезан, сок од лимон, крутони и Ворчестер сос, па им ја послужил на гостите.
За кратко време луѓето од околината дознале за салатата и почнале да доаѓаат во ресторанот на Цезар и да бараат таква салата.
Ова се случило пред точно 100 години, во далечната 1924 година.
Пица Маргарита
Една од најпопуларните пици во светот има „кралски“ корени.
Иако пицата не била храна за аристократите, во 1889 година, италијанската кралица Маргарита посакала да проба „обична храна“, па побарала од наполитанскиот пица мајстор Рафаел Еспосито да ѝ направи нешто што обичните луѓе го обожавале.
Сакајќи да ѝ угоди на кралицата, тој направил 3 типа пица: со шунка, кашкавал и ароматични зачини; лута со домати, масло и лук; и пица со домати, босилек и моцарела.
На кралицата ѝ се допаднала третата опција, и по вкус, но и по изгледот, бидејќи ги имала трите бои на италијанското знаме - бела, зелена и црвена.
Оттогаш, овој деликатес е познат како пица Маргарита.
Захер торта
Најпопуларната чоколадна торта во Австрија, Захер, има и свој празник.
Таа настанала во 1832 година, кога австрискиот министер за надворешни работи побарал да му се направи специјален десерт за вечерата на која требале да дојдат големи државници и им се заканил на готвачите дека не смеат да го посрамотат.
Но, дента шефот на кујната се разболел, па неговата работа ја презел 16-годишниот Франц Захер. Тортата што ја направил, и денес е меѓу омилените чоколадни торти, а го носи неговото име.
Павлова торта
Воздушестиот десерт од белки, украсен со јагоди, бил креиран во чест на балерината Ана Павлова.
Во 1926 година таа била на турнеја во Австралија и Нов Зеланд и ги воодушевила локалците.
Во нејзина чест настанала популарната торта за која и денес се води дебата меѓу двете земји, бидејќи и Австралијците и Новозеланѓаните тврдат дека токму тие ја измислиле.
Сендвич
Дури и популарниот сендвич, каде две лепчиња се ставаат едно врз друго, со разни додатоци во средината, има свој креатор.
А тоа е Војводата Сендвич.
Во 18-тиот век, тој не сакал да го прекинуваат додека работи, па побарал од неговите слуги да му донесат парче месо меѓу две парчиња леб, наместо цел оброк.
Тестенини Алфредо
Италијанскиот готвач Алфредо ди Лелио го измислил познатиот сос за тестенини на почетокот на 20-тиот век.
Се верува дека сосот од путер и пармезан го подготвил за сопругата откако го родила нивното прво дете.
Начос
Игнасио „Начо“ Анаја работел во мексикански ресторан.
Во 1943 година во ресторанот дошле неколку жени, во моментот кога готвачот не бил таму, па Начо нашол пченкарни тортиљи во кујната, ги исекол на триаголници, им ставил рендан кашкавал, бибер и ги ставил во рерна.
Ова мезе станало толку популарно, што брзо потоа било вклучено во менито на ресторанот.
А. Ј. | Црнобело
Би можело да ве интересира:





