Факти за животот во минатото поради кои ќе бидете благодарни што живеете во модерно време

Во минатото жените од богатите семејства посакувале снежно бел тен и за таа цел нанесувале бела пудра. Проблемот е што оваа пудра им го загрозувала здравјето бидејќи една од главните состојки било оловото.

Некогаш можеби посакуваме да сме се роделе во некое минато време, но неретко забораваме дека порано животот бил многу поразличен од она што ни е претставено во книгите и филмовите.

Забораваме дека на луѓето не им биле достапни работи без кои денес не би можеле да си го замислиме секојдневието.

Хигиенските влошки, тоалетите и одењето на заболекар без страв се луксуз кој нашите предци дефинитивно го немале.

Факти за животот во минатото поради кои ќе бидете благодарни за модерното време:

Решението за расипан заб било вадењето

Ако денес ве заболи заб, можете да отидете на заболекар и да ви го поправат. Всушност, денес заболекарите имаат моќ да спасат и навистина оштетени заби, а благодарение на анестезијата, вие нема ни да го почувствувате тоа.

Сепак, нештата биле многу поразлични пред неколку векови и неретко единственото решение за болката во забот било неговото вадење.

Не заборавајте дека обично ова се правело без никаков вид анестезија.

Лек за ќелавост со измет од птици

Во 17-ти век во Англија доста популарен бил „лекот“ за ќелавост направен со измет од птици.

Според мислењето на тогашните експерти, ако си ја миете главата со вода во која има измет од птици и сол, кога-тогаш ќе ви се врати косата.

Се претпоставува дека и викинзите користеле сличен метод за „лекување“ на ќелавоста.

Хигиенските влошки не постоеле

Само замислете како им било на жените во минатото пред појавата на хигиенските влошки.

Благодарение на денешните продукти, болката во стомакот е можеби единствениот проблем што го чувствуваме поради менструацијата.

Но, порано жените морале да се снаоѓаат како знаат за да го спречат претекувањето и импровизирале со парчиња ткаенина и слично.

Шминката била отровна

Во времето кога владеела Елизабета Прва од Англија, жените од аристократските семејства посакувале многу бела кожа. Па, оние што можеле да си го дозволат тоа, нанесувале дебел слој бела пудра.

Проблемот е што една од главните состојки на оваа пудра била оловото. Па, на некој начин, тие се труеле во име на убавината.

Оцет за миење заби

Во средновековна Британија, многу луѓе ги чистеле забите со оцет. Односно, ја плакнеле устата со мешавина од оцет и малку вода.

Овој период постоеле и други луди третмани – некои верувале дека ако ги истриете забите со мелени коски од риба, ќе ги избелите.

И животните биле осудувани

Во Европа, во периодот од 13 до 18 век, не биле осудувани само луѓе, туку и животни.

Пронајдени се записи според кои низ неколку европски земји животните, а неретко и инсектите, биле казнувани за разни злодела – од убиство до предизвикување материјална штета.

Переле облека во урина

Пред појавата на средствата за перење облека, Римјаните сфатиле дека можат да ги отстрануваат дамките од облеката со помош на урина.

Поради амонијакот што го содржи урината, на овој начин успевале да ги отстранат и најтврдокорните дамки.

Ова „средство“ за перење облека се користело и неколку векови подоцна во неколку европски земји.

Немале тоалети

Во многу древни градови се пронајдени јавни тоалети со некаков вид канализација, но ова не се ни споредува со луксузот што ни е достапен денес.

Во некои замоци имало тоалети поврзани со септички јами, но голем дел од аристократските семејства сепак морале да користат специјални садови.

А, овие садови стоеле во нивните спални соби и биле чистени од нивните слуги. Звучи навистина чудно, но некои луѓе сметале дека оваа професија е престиж.

Спирова С. | Црнобело