Беспрекорна хигиена, депилација со шеќер – забавни факти за животот во Турција

Со векови, депилацијата со шеќер е најпопуларниот третман за отстранување влакна, фризерските салони се вистински хит, а во турските продавници ретко кога ќе најдете тампони.

Со долгата историја, богатата култура и волшебните дестинации, Турција навистина е земја што може да понуди многу.

Иако е модерно општество, во Турција уште се негуваат традиции и обичаи од порано кои ѝ даваат посебен шмек на земјата. 

Иако имаме слични навики, како јадење леб со скоро секој оброк, донекаде, животот во Турција е поразличен од нашиот и сигурно можеме да научиме нешто.

Во продолжение неколку забавни факти за животот во Турција:

Бричовите не се многу популарни кај жените

За ефикасно отстранување на влакната и резултати кои траат повеќе од недела-две, ништо не ја заменува депилацијата. Бидејќи не секогаш имаме време за ова, многу често користиме и брич. Но, не и Турчинките.

Депилацијата, особено со шеќер, е најпопуларниот метод за отстранување влакна кај Турчинките, а го користат со векови.

Беспрекорна хигиена

Хигиената во домовите во Турција е на завидно ниво. Кај нив речиси и да не постои површно средување на домот, туку редовно се прави генералка и се чисти буквално секое ќоше.

Речиси сите имаат куќни помошнички

Кога сите во семејството одат на работа, јасно е дека никој нема време за беспрекорно средување на домот. Но, куќните помошнички во Турција имаат прифатлива цена, можат да си ги дозволат сите, па скоро сите ги најмуваат.

Повеќето жени избегнуваат тампони

Додека кај нас и во другите држави тампоните се многу популарни, жените од Турција преферираат влошки. Всушност, во Турција е и малку потешко да најдете тампони и ако сакате најверојатно ќе треба да одите во аптека.

Лебот е задолжителен со секој оброк

Слично како кај нас, и Турците се големи обожаватели на лебот, па го консумираат со речиси секој оброк.

На некој начин, Турците се експерти за правење лебови па низ државата можете да најдете безброј пекари кои продаваат стотици видови леб.

Разводите можат да траат многу долго

Ако нема никакви проблеми помеѓу сопружниците кои бараат развод, целата работа може да се заврши за 4-6 недели.

Но, кога има несогласувања или кога треба да се земат предвид повеќе фактори, целата процедура може да трае и по неколку години.

Наводно, некогаш било особено тешко и партнерите да добијат датум за сослушување – нешто што дополнително го одолговлекува разводот.

Фризерските салони се вистински хит

Цените во повеќето фризерски салони во Турција се релативно ниски, па жените редовно ги посетуваат не само за потстрижување, туку и за миење коса и правење секојдневни фризури.

Наводно, оваа индустрија станува сè попопуларна во Турција и сè повеќе девојки и жени посетуваат фризерски салон барем еднаш неделно.

Потпишување чевли – забавна свадбена традиција

Сите ја знаеме традицијата за фрлање бидермаер на свадба – се верува дека девојката што ќе го фати ќе биде следната којашто ќе се венча.

И на турските свадби има фрлање букети, но и многу поинтересна традиција. Секоја сингл девојка, најчесто другарките на невестата, си го пишуваат името на долниот дел од нејзините чевли.

Откако ќе заврши прославата, невестата проверува кое име е најмногу избледено и се верува дека таа девојка ќе се омажи следна.

Спирова С. | Црнобело