5 логички загатки кои ќе го „размрдаат“ вашиот мозок

Решение на загатките:

1. Шапката на затвореникот

Четворица затвореници стојат во линија на неколку скалила. Сите се завртени во иста насока. Помеѓу третиот и четвртиот затвореник постои ѕид. Сумирано нештата се вакви:

• Затвореникот бр. 1 може да ги види затворениците 2 и 3.
• Затвореникот 2 може да го види затвореникот 3.
• Затвореникот 3 не може да види никого.
• Затвореникот 4, исто така, не може да види никого.

Сите затвореници носат шапки. Кажано им е дека има 2 црни и 2 бели шапки. Ниеден од нив не знае каква боја на шапка носи. Секој од нив треба да каже каква боја на шапка мисли дека носи, штом ќе биде сигурен во тоа. Но...

• не смеат да се вртат
• не смеат да зборуваат меѓу себе
• не смеат да ги симнат шапките

Кој е првиот кој ќе даде точен одговор и зошто?

Одговор:

Затвореникот бр. 2 ќе одговори точно после некое време. Еве и зошто:

Затворениците бр. 3 и 4 не можат да ги видат шапките на другите.

Затвореникот бр. 1 гледа бела и црна шапка и знае дека неговата шапка може да биде бела или црна.

Затвореникот бр. 2 гледа една црна шапка, но ако и тој самиот носи црна шапка, Затвореникот бр. 1 би сфатил дека нему му останува да носи бела шапка и би кажал прв. Но, бидејќи Затвореникот бр. 1 не одговара ништо, Затвореникот бр. 2 ќе заклучи дека тој самиот носи бела шапка.

2. Тешкотии на патот

При менување на гума, еден човек случајно ги испуштил сите 4 навртки во решетката од канализацијата. Се обидел на многу начини да ги извади, но безуспешно. Токму кога мислел дека ќе треба да чека со часови за некој да му помогне, се појавило некое дете и му помогнало да го реши проблемот. Следејќи го советот на детето, тој ја наместил новата гума и успешно стигнал до најблискиот сервис без никакви проблеми.

Каков совет му дало детето?

Одговор:

Детето му кажало да извади по една навртка од останатите три гуми и да ги постави на четвртата.

3. Подарокот на вештерката

Некогаш одамна, некој принц го прошетал целото кралство за да ја најде совршената девојка. Летото веќе завршувало, кога пристигнал до колибата во која живеела една стара вештерка. Уморниот принц ја запрашал дали може да преспие во нејзината колиба.

Вештерката веднаш го примила, му дала храна, вода и место за спиење. Следното утро, кога принцот се подготвувал да го продолжи своето патување, таа му дала подарок, велејќи му: „Ќе дојде време, кога во текот на твоето патување ќе наидеш на широка река без мост. Единствениот начин да ја преминеш реката ќе биде да допливаш до другиот брег. Оваа волшебна туника ќе ти помогне да не се удавиш!“

Принцот продолжил со патувањето, поминале 100 денови и ноќи додека принцот стигнал до реката за која му зборувала старата вештерка. Но кога конечно стигнал до неа, веќе не му требала туниката на вештерката. Знаете ли зошто?

Одговор:

Принцот стигнал до колибата на вештерката во септември. Тргнувајќи оттаму му требале 100 денови за да стигне до реката, така што дошло веќе средина на зимата. Реката била замрзната и тој едноставно поминал чекорејќи по мразот.

4. Мистеријата со кафезот на зајакот

Еден фармер чувал зајаци во три големи кафези, кои биле наредени во редица во неговиот двор. Секој од кафезите бил обоен со различна боја – црвена, жолта и зелена. До пред некое време, бројот на зајаци во зелениот кафез бил двапати поголем од бројот на зајаци во жолтиот кафез. Тогаш, еден ден, фармерот зел пет зајаци од кафезот кој стоел на левата страна и ги донирал во локалното училиште. Тој, исто така, извадил половина од зајаците кои останале во кафезот од левата страна и ги пренесол во кафезот со црвена боја.

Која боја бил кафезот кој стоел на левата страна?

Одговор:

Кафезот кој стоел на левата страна бил со жолта боја.

Како што претходно дознавме, бројот на зајаци во зелениот кафез бил двојно поголем од бројот на зајаци во жолтиот кафез. Тоа значи дека бројот на зајаци во зелениот кафез бил парен број. Откако фармерот извадил пет зајаци од кафезот на левата страна, бројот на зајаци кои останале во кафезот станал парен број (ова се докажува со фактот дека може да се подели на пола). Според тоа, пред да се отстранат тие пет, зајаци кафезот на левата страна содржел непарен број зајаци, така што тој не може да биде со зелена боја. А според информациите кои ги добивме, не e ниту со црвена боја.

5. Што е заедничко за сите луѓе на Земјата?

Можете ли да наведете една работа која истовремено ја прават сите луѓе на Земјата?

Одговор:

Стареат.

М. С. | Црнобело