Претерано или функционално - Која марка направи телефон со 5 камери?

Компанијата LG овој месец го лансира својот најнов паметен телефон. За прв пат на пазарот излегува мобилен телефон со дури 5 камери. Две од нив се наменети за селфи, а другите три се од задната страна на мобилниот телефон.

Најновиот модел на LG е именуван V40 ThinQ и е најјакиот паметен телефон од брендот на LG.

Можеби се прашувате зошто се потребни 5 камери?

LG изминативе неколку години беше познат по тоа што втората задна камера на нивните телефони беше со широк објектив. Во овој модел тие ја задржаа таа камера и додадоа уште една со телефото објектив.

Дополнително, додадоа уште една камера со широк објектив и од напред, заради трендот на правење селфи фотографии и така се стигнува до бројката од 5 камери на еден мобилен телефон.

Ова овозможува вашиот телефон да биде подготвен за секоја ситуација за фотографирање во која би се нашле.

Со најновиот LG V40 ThinQ можете да сликате со трите камери (стандардната, со широк објектив и телефото камерата) наеднаш и да креирате кратко видео со само еден допир.

Камерата сама ви препорачува која леќа да ја одберете за фотографирање, така што препознава што има во кадарот. Можете да креирате делумно анимирани GIF фотографии со селектирање на тоа кои делови од сликата сакате да бидат анимирани како и ред други опции кои ќе ви помогнат целосно да го искористите потенцијалот на петте камери.

Покрај ова, телефонот има 6,4 инчен OLED екран со забец во којшто се вметнати камерите, а којшто е карактеристичен за сите понови ексклузивни телефони.

Дополнително, за да ја оправда високата цена, најновиот паметен телефон на LG располага со импресивни перформанси, поточно: Qualcomm Snapdragon 845 процесор, 6 GB RAM меморија, 64 GB внатрешна меморија и опција за зголемување на истата со microSD мемориска картичка, отпорност на прашина, вода и удари и се разбира најновиот Aндроид оперативен систем 8.1 Oreo.

(О)Милена | Црнобело