5 работи што никако не смеете да ги споделите со ChatGPT

Доверливи информации од работа или ваши лозинки – кои работи не треба да ги споделувате со четботови како ChatGPT и зошто?

ChatGPT е алатка што веќе ја користиме сите – како за на работа, така и за приватни проблеми и дилеми.

Но, иако ни олеснува многу обврски, не треба да заборавиме дека треба да бидеме внимателни со она што го споделуваме со четботот.

Информациите што му ги даваме на ChatGPT кога бараме помош за нешто можат да бидат искористени за тренирање на четботот, а некогаш можат да допрат и до некој друг.

Односно, она што го споделувате со четботот не се гледа како доверлива информација, па лесно може да падне во погрешни раце.

Генерално, безбедно е да го користите ChatGPТ, само треба да бидете внимателни да не споделувате одредени податоци и секој разговор со четботот третирајте го како јавен разговор,

5 работи кои не треба да ги споделувате со ChatGPT:

Нелегални или неетички барања

Иако ChatGPT и повеќето други четботови не дозволуваат да се користат за нелегални или неетички работи, некои луѓе сепак се обидуваат.

Но, дури и ако четботот одбие да ја изврши задачата, вашето барање за нешто нелегално може да остане зачувано.

Па, може да се соочите со легални последици, во зависност од тоа каде сте и кои закони се на сила во врска со вештачката интелигенција.

На пример, во Англија со закон е забрането да се прават и споделуваат експлицитни слики генерирани со вештачка интелигенција.

Податоци за онлајн профили

Никогаш не споделувајте лозинки и податоци за најавување на вашите онлајн профили со ChatGPT или со кој било четбот.

Ако, на пример, некој ви ја пробие лозинката на ChatGPT, тогаш лесно може да ги најде овие податоци доколку сте ги споделиле со четботот.

Финансиски податоци

Никогаш немојте да споделувате какви било информации за вашите финансии. Овде спаѓаат и број на сметка, на картичка, лозинки и сè слично.

Додека банките и онлајн продавниците имаат заштита за податоците на нивните корисници, четботот не нуди никаква заштита на овие информации и ризикувате многу ако ги споделите него.

Доверливи информации од работа

Во ред е да користите четбот како ChatGPT на работа, но никако немојте да споделувате доверливи информации од вашата компанија.

Доколку овие информации протечат, не само што ќе ја загубите работата, туку ќе си ја уништите репутацијата, а може да се соочите и со тужба.

Медицински информации и лични податоци

Досега веројатно сте го искористиле ChatGPT за здравствен совет, но избегнувајте да споделувате нешто лично. Во ред е да прашате за симптоми, терапии и слично, но никогаш не кажувајте детално каква е вашата медицинска состојба.

Медицинските досиеја се доверливи, но не кога ќе ги споделите на ChatGPT.

Истото важи и за вашите лични податоци како матичен број.

Спирова С. | Црнобело