Кајли Џенер критикувана за вознемирувачката креација со глава на лав: „Зошто имаш животно на фустанот?“

Детали

вторник, 24 јануари 2023

„Промовираш ловење животни“, „Кралот на животните не е моден додаток“ - Кајли Џенер критикувана за креацијата со вештачка глава на лав во реална големина, со која се појави на ревија во Париз. Покрај критичарите, има и такви кои ја бранат и сметаат дека креацијата е вистинска уметност, а истата ја носи и Ирина Шајк. 

Кајли Џенер (25), се појави на модното шоу на Schiaparelli на Париската модна недела, во стајлинг со необичен додаток, кој предизвика низа коментари во целиот свет.

Таа пристигна на ревијата облечена во црна тоалета, на која беше фиксирана глава на лав со реална големина, што е креација од новата колекција на брендот, која беше промовирана на ревијата на којашто присуствуваше младата богаташка.

Дизајнот бил направен од креативниот директор на брендот, Даниел Роузбери, и е рачна изработка од вештачки материјали.

„Убавицата и ѕверот. Ти благодарам Даниел Роузбери и Schiaparelli за ова посебно утро. Уживав во тоа што ја носев оваа вештачка уметничка креација, направена рачно“ – напиша таа на Инстаграм.

Иако многумина ја претставија како иновативна, грандиозна и креативна креација, сепак не сите се воодушевени од овој изглед на Кајли.

Оние кои не се воодушевени од креацијата, го претставуваат стајлингот како страшен, смешен и една од најголемите модни грешки, а подетално пишуваат:

„Но, зошто? Зошто воопшто да се имитира ова? Благодарна сум што е лажно, но глетката сепак е вознемирувачка.“

„Ова не е мода.“

„Зошто носиш животинска глава на фустанот? Вештачка или не... ми нема логика“.

„Изгледа сега повеќе Американци ќе одат во Африка за да си набават нови модни додатоци од дивината. Промовираш ловење животни. Ова е погрешно од многу аспекти. Кралот на џунглата не е моден додадок“.

„Се надевам дека лавот не е жив.“

„Ако лавот оживее, бегајте!“

„Кажи ми дека си лав во хороскоп без да ми кажеш дека си лав.“

Сепак, не сите го сфатија изгледот навредливо, а на самата ревија за колекцијата пролет-лето 2023 на брендот, на модната писта со слични креации со вештачки животински глави на лав, волк и леопард, зачекорија и Ирина Шајк, Наоми Кемпбел и други модели, а инспирацијата, креативниот директор на брендот ја црпел од „Пеколот“ на Данте.

Повеќе фотографии од изгледот на Кајли: 

• 
• 
• 
• 
• 
• 
• 
• 
• 
• 
• 
•  

M. Л. | Црнобело