Зошто Ријана краде чаши од клубови и ресторани?

Детали

среда, 20 јуни 2018

Дали е во прашање клептоманија, необично колекционерско хоби, или, пак, нешто сосема трето? Ѕвездата од Барбадос неодамна се соочи со засрамувачки фотки од минатото. И воопшто не се потресе, туку даде лично видување за конкретната навика.

Познато е дека атрактивната Ријана го води животот по свои правила и како што таа сака, не обрнувајќи внимание на она што другите го зборуваат.

Популарната пејачка има мноштво хитови позади себе, своја линија за шминка и долна облека, како и посебен стил на облекување, по кој е препознатлива и само таа умее да го износи. 

Ова се само дел од причините поради кои луѓето ширум светот ја обожаваат Рири од Барбадос, па спремни се да ѝ простат и за постапките што навидум се чинат погрешни. Една од нив крена прашина деновиве.

Поодамна пишувавме дека чашата за вино е новиот моден додаток на Ријана. Годинава, пак, се обзнани дека таа всушност е сериски крадец на чаши. Постојано си заминува од ноќните клубови или ресторани со чашка aлкохол во раката. Без дозвола секако(?!).

При гостувањето во британската емисија „The Graham Norton Show“, водителот ѝ покажа низа папарацо фотки, каде јасно се гледа како ѕвездата излегува од разни ресторани и барови со полни чаши вино.

Коментирајќи една од фотографиите, убавицата во свој манир се пошегува дека „тоа веројатно е чашата што сама си ја донела во клубот“. За друга, пак, тврдеше дека „подоцна ја вратила во хотелот од каде ја земала“.

Сепак, за повеќето „кражби“, слатко си се смешкаше, потврдувајќи дека едноставно не сака да ја остави недовршената пијачка, дури и кога ќе одлучи да ја продолжи вечерта на ново место. Па, затоа и редовно си ја понесува чашката со себе.

За крај, на пејачката ѝ беше прикажано како од ресторан изнесува и цело шише вино, по што само кусо додаде: „Мојата мајка ќе го види ова. Извини, мамо!“

Какво е вашето мислење за ваквиот гест? Би си заминале ли од локалот со пијалак што сте го платиле, а не сте го допиле? Погледнете што прави Ријана во оваа ситуација:

• 
• 
• 
• 
• 
• 
• 
• 
• 
• 
• 
• 
• 
• 
• 
•  

M. A. | Црнобело