Не спијат до пладне: Познати личности кои стануваат рано

Детали

сабота, 02 декември 2017

Тие супер изгледаат, работат на пет различни проекти и уште имаат време за семејството и посета на настани. Како ли им успева сѐ да стигнат?

Се жалите што сте спиеле само седум часа? Мишел Обама се буди во 4 часот наутро!

На моќниците од ѕвездената индустрија и деловниот свет, парите им овозможуваат одредени работи да ги направат побрзо и поефикасно од нас – „обичните“ смртници.

Тие не мора самите да се грижат својата шминка, фризура, гардероба, да чистат, или, пак, да готват.

Но, тоа не значи дека најуспешните меѓу нив секој ден спијат до пладне, а потоа се излежуваат покрај базенот.

Погледнете во колку часот стануваат познатите ранобудници:

Мишел Обама – 04:00

Поранешната прва дама на САД се буди во 4 часот наутро, па заедно со сопругот вежбаат во домашната теретана. „Обично таму стигам пред него. Гледаме спортски канали, вежбаме и разговараме.“, открива Мишел Обама.

Ана Винтур  – 05:45

Со нејзината сурова професионалност, таа е страв и трепет во модниот свет. Ана Винтур станува секој ден во 05:45, за да може еден час да игра тенис, пред стилистката да ѝ ја исфенира косата во препознатливата фризура.

Гвинет Палтроу – 04:30

Популарната глумица се буди толку рано, бидејќи сака да биде во мир и да вежба јога. „Не сум утрински тип. Тоа е прашање на упорност“, вели Гвинет Палтроу.

Марк Волберг – 02:30

Славниот глумец и продуцент станува во ниедно време, за да одработи дури два тренинга.

Прво вежба во домашната теретана, а потоа вози до кошаркарски терен, каде игра баскет. Веќе во 6 часот јаде појадок, кој се состои од салата и пилешко.

Викторија Бекам – 06:15

Мама Бекам се буди петнаесетина минути после 6 часот, но не за да вежба. Таа сака да има час време за работа, пред децата да станат од кревет.

Хауард Шулц, генерален директор на Starbucks – 04:30

Хауард станува многу рано. Два часа чита весници, пребарува на интернет и вежба, а потоа трга на работа.

Во колку часот станувате вие?

М. А. | Црнобело