Мартин Спировски: „Активниот начин на живот треба да биде секојдневие, не само привремен проект“

Детали

вторник, 01 април 2025

Секој може да биде најдобра верзија од себе, само ако е подготвен да вложи труд и да верува во процесот, истакна личниот фитнес тренер Мартин Спировски. 

Мартин е човек кој ја разбира важноста на секојдневните избори и притоа ги користи своите знаења и вештини да создаде персонализирани тренинг програми кои се во согласност со потребите и целите на секој поединец.

Како персонален тренер, тој е целосно подготвен да биде водич на тој пат и да ги инспирира сите да започнат, без разлика колку им изгледа тешко на почетокот.

Со своето знаење и посветеност, Мартин им помага на луѓето да бидат во врвна физичка форма и ги води на патот кон подобрување на нивното целокупно здравје, како физичко, така и ментално. 

Мартин верува дека секоја мала промена може да доведе до големи резултати, и со своите професионални совети и поддршка им овозможува на своите клиенти да се чувствуваат сигурни и мотивирани да ги достигнат своите цели.

Тој на сите им ја пренесува својата страст кон фитнесот воден од девизата – активниот начин на живот треба да биде секојдневие, не само привремен проект. 

Како се заљуби во фитнесот и стана персонален тренер?

Мартин Спировски: Откако на себе ги почувствував сите бенефити од физичката активност и блансираната исхрана, решив да навлезам подлабоко во истражување и образование за да можам да им помогнам на што повеќе луѓе да си го подобрат квалитетот на животот.

Кој е најголемиот мит за вежбањето што би сакал сите да престанат да го веруваат?

Мартин Спировски:  Има многу митови помеѓу луѓето што не се потрудиле да истражат малку подобро за фитнесот.. Крвниот притисок се зголемува со вежбањето, мускулите виснуваат кога ќе престанеш да вежбаш...

Кој тип на тренинг го препорачуваш за оние што сакаат брзи резултати – повеќе тежини или кардио? 

Мартин Спировски:  Не препорачувам да имаат таква цел луѓето што започнуваат со фитнес, целта би требало да ја постават во однос на нивното здравје, функционалност, здрава избалансирана исхрана, повеќе енергија во текот на денот, а физичките резултати ќe го пратат процесот..

Како да останеме мотивирани кога ни се мрзи да одиме во теретана?

Мартин Спировски:  Не треба да бидете мотивирани за да одите во теретана и да водите здрав живот, тоа треба да е дел од вашето секојдневие.

Кое е најчестото алиби што луѓето го користат за да не тренираат – и како им го рушиш?

Мартин Спировски:  Морам да споменам две најчести а тоа се: здравиот живот е скап и немам време.

Подготвувајте оброци дома, одете во теретана, правете 30-40 минутни прошетки во природа, наместо да јадете надвор „fast food”, или во ресторани секој ден и ќе дојдете до заклучок дека сте заштедиле пари, време и почнувате да се чувствувате многу поенергично и поздраво.

Сите луѓе имаат еден тон обврски, деца, факултет, работа или две работи, но сигурно секој за себе може да одвои  три часа за вежбање во текот на целата недела за да го подобри неговото здравје и функционалност.

Ако некој сака да ослаби, која е првата промена што треба да ја направи во исхраната?

Мартин Спировски:  Да се биде внимателен со храната, односно да се внесува минимум 3-4 оброци правилно распоредени во текот на целиот ден. Само така ќе има ефект во однос на тоа да се направи вистинска промена.

Кој е твојот совет за оние што размислуваат да почнат, ама „ќе почнат од понеделник“? 

Мартин Спировски: Нема идеално време за почеток. Што повеќе се одолговлекува несвесно го ставаме телото во потешка ситуација отколку што е сега. Започни со мали промени во исхраната и физичката активност. Од “понеделник“ е само изговор, започни од денеска.