Традиционалната трка ХалкЕко Скопје трча 10км годинава собра 1500 професионални тркачи и вљубеници во трчањето

Детали

понеделник, 08 мај 2023

Дарио Ивановски од Македонија со помината делница од 10 километри за 30:22 минути, во машка, и Билсерин Сулејман од Бугарија со време од 36:58 минути, во женска конкуренција, се победници на годинешната трка ХалкЕко Скопје трча 10км која по седми пат се одржа низ улиците на главниот град.

Организатор на овој спортски настан е Сојузот на спортови на Скопје во соработка со А.К.Работнички и со помош на Министерството за внатрешни работи на Република С.Македонија. Главен партнер на трката и годинава беше Халкбанк АД Скопје која е позната како голем промотор на здрави животни навики и заштита на природата, па во тие рамки и како поддржувач и организатор на низа спортски настани.

ХалкЕко Скопје трча 10км е втора трка во Македонија (после ВизЕр) која се здоби со меѓународен сертификат од АИМС и Светската Атлетика и сите постигнати резултати и норми ќе бидат признаени од овие меѓународни институции.

Во трката втор на целта во машка конкуренција пристигна Тирон Мамуша од Албанија, додека трет беше Иван Пешовски од Македонија. Во женска конкуренција второпласирана беше Биљана Кираџиева од Србија, а третото место го освои Маринела Цекова од Бугарија. Освојувачите на првите пет места во машка и женска конкуренција добија парични награди, а со дипломи и пехари беа наградени освојувачите на првите три места во возрасните категории: од 35 до 44 години, од 45 до 54 год., и 55+ год.

ХалкЕко Скопје трча 10км како и секоја година привлече голем број професионални и рекреативни тркачи потврдувајќи дека трчањето како спорт станува сè попрактикуван во земјата. Од фонтаната Лотус пред Градскиот парк, како почетна и завршна точка на трката, долж булеварот Илинден и дел од булеварот Партизански одреди, се натпреваруваа и забавуваа 1.500 учесници, колку и што беа предвидени како максимален број на натпреварувачи, кои ги бодреа многу граѓани долж предвидената траса.

Трката е уште еден спортски настан поддржан од Халкбанк, како промотор на активности врзани за негување здрави животни навики и зачувување на животната средина, кои се реализираат преку платформа ХалкЕко. Многу спортски настани во изминативе години добија поддршка од банката, а таа самата е организатор на хронометар велосипедската трка Халк Вело Грин која веќе три години се одржува во Маврово на 8 септември.

Платформата ХалкЕко е развиена од истоимената апликација која ги поттикнува корисниците да ги остават автомобилите и да практикуваат здрав животен стил, придонесувајќи со тоа за намалување на емисијата на штетни гасови CO2 и истовремено за садење нови дрвја. За секоја активност: трчање, пешачење или возење велосипед, секој кој ја користи апликацијата собира HalkCoins за кои, во зависност од бројот, освојува подароци и други бенефиции, но истовремено обезбедува и дрвја кои Халкбанк презема обврска да ги засади. Банката досега има организирано повеќе акции за зазеленување и пошумување и има донирано над 33.000 садници во земјава.