Слаткар ги собра Тони Зен, Тајзи и 2Бона: „CRNOBELO ми беше инспирација за ‘тајната вечера’“ (видео)

Детали

вторник, 05 ноември 2024

„Ние мажите сме малку тешки, заборавени и да не беше CRNOBELO.com, тешко дека ќе се соберевме“ - ни кажа Слаткар, кој поттикнат од анкета на нашиот портал, ги одведе на вечера Тони Зен, Тајзи и 2Бона.

Марко Маринковиќ Слаткар е човек кој кога ќе вети нешто - не си го погазува зборот.

Неодамна во анкета за CRNOBELO.com, тој ни одговараше на неколку кратки прашања, меѓу кои и: „Кои 3 личности би ги поканил на вечера во твојот дом?“

„Тони Зен, 2Бона и Тајзи. 2Бона се двајца, али ќе ги рачунаме ко еден, така што би ги повикал нив на вечера. И не би готвел, туку би нарачал“, кажа тогаш Слаткар.

Поттикнат од анкетата, тој реши да ги собере популарните рапери и да поминат една пријатна вечер заедно, а тоа се случи синоќа (04.11).

Па, така, на една тркалезна маса седнаа Тони, Тајзи, 2Бона и Слаткар.

Дека конечно се собрале, Марко сподели на Инстаграм Стори со кратко видео и порака: „CRNOBELO.com - реков, ветив, исполнив“.

По вечерта помината во друштво на своите пријатели, Слаткар накратко ни раскажа за нивната дружба:

„Уште пред некој месец кога излезе видеото со прашањето ‘кого би поканил на вечера’, им се јавив на Тони, Тајзи и на Марио и Антонио од 2Бона и им кажав дека сакам да се подружиме сите и да седнеме на вечера.

Вчера со Тони Зен снимавме нов спот, за песната ‘Жими сè’ и кога размислувавме за сценариото, ми текна дека можеме да се собереме сите, да ја направиме таа вечера за којашто зборувавме и да ги ставиме и дечките во спотот.

Се договаравме едно 2-3 недели и се најдовме понеделнички сите слободни, па се собравме.

И како што напишав на самото Стори на Инстаграм: „Реков, ветив, исполнив“.

Вие ми бевте инспирација за самата вечера, или што би рекле момците за ‘тајната вечера’.

Немаше ништо тајно, ха, ха, ама беше фино, си поминавме убаво. Беше пријатно, ептен ми се свиѓаше.

Многу беше убав спојот, кога ќе ги видиш на едно место Тони Зен, кој почнал кариера во 2007-ма, па после сум јас, па Тајзи, па како најмлади 2Бона, кои почнале пред само неколку години.

Многу сум среќен што и денес сум океј со сите битни рапери кои работат од средината на 2000-тите па до денес, што се почитуваме еден со друг.

Поминале многу години, а ти и понатаму си дел од истата свежа приказна - и многу ми е ќеф што е така.

Ама пак да кажам, ние мажите сме малку тешки, заборавени и да не беше CRNOBELO.com, тешко дека ќе се соберевме во овој состав“.

Погледнете го видеото:

©CRNOBELO.com Забрането преземање и копирање. Крадењето на авторски текстови е казниво со закон.

А. Ј. | Црнобело / фото: Наташа Величковска