„Вие сте нашите амбасадори“ – Македонски средношколци освоија сребрен и бронзен медал на Олимпијада по хемија

Детали

вторник, 30 јули 2024

„Повторно нѐ направивте среќни и горди“ – им порачаа наставниците на нашите средношколци кои на Македонија ѝ донесоа уште два медала. Овојпат по хемија...

Најмногу нè радуваат успесите на нашите млади и талентирани деца, кои со своето знаење ја претставуваат нашата држава, а назад се враќаат со медали, признанија и дипломи.

Вестите за нивните успеси, секојдневно ни докажуваат дека ние имаме талентирана младина со која можеме да се гордееме, а доказ за тоа се и големите достигнувања на научните Олимпијади.

По убавите вести за успесите на нашите ученици на Олимпијадите по математика и физика, и нашите млади хемичари нè израдуваа.

Сојузот на хемичарите (и технолози) на Македонија, вчера на својата Фејсбук страна објави вест за успехот што нашите средношколци го постигнаа на Интернационалната олимпијада по хемија, која се одржува во Ријад, Саудиска Арабија.

Годинава, на натпреварот учествувале Иван Костевски и Марио Ванчоски, ученици на гимназијата „Славчо Стојменски“ од Штип, Елена Живаљевиќ од училиштето „Јахја Кемал“ од Скопје и Петар Мирчевски од гимназијата „Мирче Ацев“ од Прилеп.

Најголем успех меѓу нашите олимпијци постигна Петар Мирчески, кој во Македонија се враќа со сребрен медал, додека штипскиот гимназијалец Марио Ванчоски освои бронзен медал.

Покрај големиот број честитки и пораки за поддршка, на официјалната Фејсбук страница на штипската гимназија „Славчо Стојменски“ се огласи и наставниот кадар, кој порача:

„Прекрасни вести од Ријад, Саудиска Арабија, од 56 Интернационална Олимпијада по Хемија, нашиот Марио Ванчоски освои бронзен медал.

Повторно нѐ направивте среќни и горди Марио и Иван, сите ученици и вработени од СОУ Гимназија Славчо Стојменски се радуваат за вас, вие сте нашите амбасадори!“

Б. С. Б. | Црнобело