Денес се слави Атанасовден – Денот кога се верува дека големите студови веќе се поминати

Детали

среда, 31 јануари 2024

Среќен именден Атанас, Танас, Тане Таска... Се слави зимскиот Свети Атанасиј, денот кога се верува дека зимата е на средина.

На последниот ден од јануари, православните верници го слават празникот Свети Атанасиј Велики.

Свети Атанасиј се слави двапати во годината, како заеднички спомен на двајцата александриски архиепископи Свети Атанасиј Велики и Свети Кирил Александриски, за нивните заслуги во одбраната на христијанството.

Свети Атанасиј се слави како куќна слава во голем број македонски семејства, а именден слават Атанас, Атанаска, Танас, Тане, Танаска, Насе, Насте…

Исто така, зимскиот Свети Атанас според верувањата се сметал за ден што ја означува средината на зимата, односно се верувало дека големите студови веќе се поминати.

Свети Атанасиј Велики бил роден во Александрија во 296 година.

Тој од детството бил наклонет кон духовниот призив, а бил ѓакон кај архиепископот Александар, и го придружувал на Првиот Вселенски Собор во Никеја.

На овој Собор многу се прославил со неговата ученост, благочестие и ревност за Православието.

По смртта на Александар, свети Атанасиј бил избран за архиепископ Александриски, а на таа позиција останал повеќе од 40 години.

Речиси сиот живот бил гонет од еретиците. Од царевите најмногу го гонеле Констанциј, Јулијан и Валент; од епископите Евсевиј Никомидиски со уште мнозина други; а од еретиците Ариј и неговите следбеници. БИл принуден да се крие од гонителите дури и во бунар, во гроб, по приватните куќи, по пустините.

Мал е бројот на светителите што биле толку клеветени и толку злосторнички гонети како светиот Атанасиј.

Б. С. Б. | Црнобело