Николче има сопруга Украинка: „Ја запросив во Украина, синот ни се роди во Германија, а свадба ќе правиме во Демир Хисар“

Какви се Украинките како сопруги? Го ценат ли бракот како институција?

Мојата сопруга е целосно посветена на нашето семејство, а институцијата брак има огромно значење за неа.

Ѝ се допаѓа ли Македонија? Што ѝ е омилено од нашите специјалитети?

Во Македонија има престојувано краток период и не успеав да ѝ ги покажам сите убавини кои ги има нашата држава и добриот, топол народ. Тоа ќе го направам сега ова лето кога ќе бидеме таму подолго на одмор.

Од тоа што успеа да го види таа е воодушевена од нашите планини, природа и секако од Охрид и Охридското езеро.

Воопшто храната во Македонија ѝ се допадна многу, но како фаворити ѝ се тавче гравче и ајвар во комбинација со македонско сирење.

Колку беше тежок периодот на разделеност со саканата? Функциониравте ли онлајн?

Откако сме во брак не сме живееле разделено, само во периодот додека бевме како дечко и девојка на 1 месец бевме разделени и тогаш секако дека функциониравме онлајн.

Тежок ли е германскиот јазик?

За жал, немав никакви познавања на германскиот јазик пред доаѓањето тука, бидејќи во Македонија работев и комуницирав на руски јазик, кој сега ми служи за комуникација со сопругата.

Што се однесува до германскиот веднаш ќе ви кажам, да, тежок е. Според можностите што ги имам се трудам да научам колку можам повеќе, за да можам да комуницирам на едно солидно ниво.

Сопругата пред породувањето посетуваше курсеви за германски јазик и таа го владее подобро од мене, па така здружено успеваме да се снаоѓаме и ги решаваме тековните процеси.

Што ви се допаѓа најмногу од животот во Германија?

Најмногу ми се допаѓа системот, иако е малку спор, но сепак функционален е и еднаков за сите. Тоа што не се оптоваруваме со политика и сме далеку од нашата вплетканост на политиката во секој сегмент на општеството.

Чувствуваме социјална и правна заштита од државата, работа може да се најде за секој којшто сака и колку сака да работи, и на крај тоа што се наоѓаме во центарот на Европа.

Што ви недостига најмногу од животот во Македонија?

Најмногу ми недостасува мојата активност во спортот и дружбите после секој тренинг, натпревар или турнир.

Секако дека ми недостасува фамилијата, нашите заеднички фамилијарни празници, кафето со другарите и Македонија како моја татковина со сите свои убавини.

Каква се цените на храната? Дали се малку пластични овошјето и зеленчукот навистина? Ви недостига ли бурек?

Светската криза си го направи своето и во Германија, цените пораснаа за мал процент, но сметам дека според стандардот цената на храната е сè уште прифатлива.

Често на социјалните мрежи знам да објавам какви се цените на храната во Германија и добивам повратни коментари дека некои производи моментално се еднакви, а некои поскапи во Македонија.

Квалитетот на овошјето и зеленчукот по маркетите е понизок од нашиот во Македонија, но сепак може да се најдат и тука доста квалитетни производи. Еве на пример ние купуваме свежо млеко и земјоделски производи директно од земјоделци и фарми во нашата околина.

Но, мора да признаам, ми недостасува понекогаш топол бурек со јогурт, но и чорба.

Продолжува на следната страна...