Ангелина Китановска, наш успешен модел: „Моите пропорции се 86-60-89 и имам 53kg, но клучни се самодовербата и ставот“

Детали

среда, 12 февруари 2025

„Најтешкиот ангажман, во суштина, не бил мој личен ангажман во улога на модел. Беше првиот Скопски Моден Фестивал, кога требаше да изменаџирам 50+ модели – со очекување сите да се однесуваат како мене, сè да знаат, на сè да бидат спремни“, вели Ангелина Китановска (31) за CRNOBELO.com.

Ангелина Китановска (31) е наш успешен модел, кој повеќе од 13 години е активен во светот на модата, како во Македонија, така и во регионот.

Таа вели дека се смета за професионалец е и визионер во модната индустрија, и дека нејзината меѓународна кариера како професионален модел од 2012 година ги подигнува стандардите на модната сцена во Македонија и регионот.

Со образование насочено кон уметноста и комуникациите, што ѝ помага да ја разбере модата како уметничка форма и како бизнис – како основач на Max Models, моделинг агенција која функционира под капата на Max Management Inc., таа го претвори своето богато искуство во платформа за поддршка и развој на нови таленти.

Со диплома по моден бизнис и дизајн, со повеќе од 7 години професионално искуство во организирање и менаџирање на настани, Ангелина демонстрира извонредна способност за адаптација и лидерство.

Паралелно со своите студии, Ангелина учествувала на неколку меѓународни уметнички изложби, вклучувајќи ги најголемите во Азербејџан и Турција во 2014 година.

Од 2014 до 2019 година, како маркетинг и менаџер на настани во PWorld, таа успешно ги организираше најголемите светски маркетинг едукативни семинари, покривајќи локации од Њујорк, преку Европа, до Сеул.

Во 2018 година, ја прошири својата професионална дејност како ТВ водител и презентер, а во 2019 година започна претприемачки проект со основањето на модниот бренд KTN.

Денес, како ко-сопственик на Max Management Inc., Ангелина работи како продуцент за Max Management и Скопскиот моден фестивал.

Со неуморна посветеност и иновативност, таа го претвори Max Models во агенција која служи како мост помеѓу локалните таленти и глобалните можности.

За CRNOBELO.com споделува детали од професијата:

Колку години работиш како модел? Се заработува ли од оваа професија во Македонија?

Работам како модел повеќе од 13 години. Во Македонија модната индустрија е ограничена, но за талентираните и амбициозни модели, постојат можности да заработат.

Најголемиот дел од приходите доаѓаат од меѓународни ангажмани.

Кои се критериумите да се биде добар модел?

Успехот во моделингот бара комбинација од дисциплина, професионалност и уникатност. Иако физичките пропорции се важни, харизмата, самоувереноста и способноста да се пренесе визијата на дизајнерите и фотографите се одлучувачки фактори.

Моите пропорции се 86-60-89, а тежината ја одржувам околу 53 килограми, но за мене најважна е способноста да се прикаже облеката со стил и став.

Што мислиш, кој е твојот најсилен адут при кастинзите?

Мојата самоувереност, професионалниот пристап и подготвеноста се моите најсилни адути.

Секогаш влегувам на кастинзи со позитивна енергија и со јасна цел да ја пренесам визијата на тимот.

Важен аспект е и моето искуство, кое ми овозможува брзо да се адаптирам на барањата на дизајнерите и фотографите.

Најголемите успеси досега…

Еден од моите најголеми успеси е основањето на Max Models и трансформирањето на агенцијата во платформа која поврзува локални таленти со глобални можности.

Дополнително, горда сум на учеството на престижни модни настани и соработката со реномирани брендови кои ја препознаваат мојата работа и посветеност.

Држиш ли диета? Како ја одржуваш формата?

Не следам строги диети, туку се фокусирам на здрав и балансиран начин на живот. Се трудам да држам рутина на вежбање, што ми помага да останам физички и ментално здрава.

Исхраната ја темелам на свежи и природни состојки, со избегнување на преработена храна.

Продолжува на следната страница...