Како да не се здебелите во празничниот период со вкусни и богати трпези?

Секоја година го велиме истото, дека оваа зима нема да дозволиме да качиме некој килограм, но кога ќе почнат славите, прославите и богатите трпези, тешко ни оди да стоиме на зборот.

Сепак, тоа не значи дека е невозможно и дека е дозволено и оправдано секоја зима да качувате по неколку килограми.

Иако многумина не можат да одолеат на вкусните трпези кои се подготвуваат во празничниот период, сепак може да ставите граници и да ја задржите идеалната фигура.

Доколку сте во потрага по начин како да успеете во тоа, следниве трикови ќе ви бидат корисни:

1. Ако сте вечерта на прослава, не размислувајте цел ден на тоа, и не си викајте дека цел ден ви е „cheat day“. Појадокот и ручекот може да бидат умерени, не го прескокнувајте вежбањето и не го претворајте цел ден во „дебелеење“.

2. Пред да одите на прослава, каснете нешто дома што ќе ве задржи и нема да ве тера да изедете сè на трпезата штом стигнете.

3. Ако не сакате да јадете калорична храна, а не можете да гледате како другите јадат, носете си бадеми кои ќе ги грицкате одвреме-навреме за да се залажете.

4. Ако вие имате прослава, не јадете додека готвите, а откако ќе подготвите сè, држете се настрана од трпезата и кујната.

5. Наместо да седите на трпеза и да јадете, зборувајте со луѓето, одете од човек на човек и дружете се за да имате занимација и да заборавите на јадење.

6. Наместо да ги ловите кифличките, руската и француската салата, фокусирајте се прво на свежите и поздрави јадења на трпезата и ставете си прво од нив, а ако ви остане место, пробајте малку од другото.

7. Облечете се во облека која прави да се чувствувате гламурозно и нема да ви биде сеедно да јадете сè и сешто со неа.

8. Ако бирате алкохол, одберете црвено вино, но не претерувајте со количината.

9. Доколку се работи за забава, танцувајте повеќе, така можеби ќе согорите и неколку калории, а ќе бидете далеку од трпезата.

М. М. | Црнобело