Свадбени трендови за 2013 година

Доколку одлучивте дека вашата љубов ќе ја овековечите токму оваа година, сигурно во главата веќе имате многу идеи, па дури и не можете да се одлучите само за една.

За да ви го олесниме планирањето, ви ги претставуваме најголемите свадбени трендови за 2013 година кои можеби ќе ви се допаднат, па и ќе станат дел од вашиот прекрасен, долго планиран ден.

1. Неутрални бои

Тиркизната и розовата оставете ги во изминатите години. Оваа година на ред се пастелната розова, нијансата на праската, пастелната ментол зелена, кремастата и светло сивата.

2. Раскошно осветлување

Без оглед дали ќе се одлучите за свадба на отворено или пак во затворен простор, не ги придушувајте светлата. Одберете светол простор, со раскошни светилки и лустери над секоја маса. Создадете целина исто како од бајка.

3. Свежо цвеќе

Ако сте љубител на вештачкото цвеќе, ќе мора да ве разочараме. Подобро е да одберете свежи, романтични цветови, надвор од шаблонот. За момент заборавете на црвените рози кои се симбол на љубовта и заменете ги со романтичниот божур во црвена и нежно розова боја.

4. Ретро фустани

Изгледа дека дваесеттите, триесеттите и четириесеттите години се враќаат повторно. Оваа година ќе гледаме повеќе ретро невести, отколку раскошни фустани во стилот на принцезите и сирените.

5. Пунџи во стилот на балерините

Кога станува збор за фризурите, веројатно оваа година најпопуларни ќе бидат пунџите во стилот на балерините, а на второ место се најде пуштената виткана коса префрлена на страна.

6. Чипка

Чипката е модерна веќе извесен период, па затоа покрај за фустанот, одберете да ја има и на вашите покани или декорации во ресторанот.