Како се разликува пандемијата со корона вирусот од другите пандемии низ историјата?

Информациите и дезинформациите се шират многу побрзо и полесно

Ни Македонија не остана имуна на лажните вести, кои денес се шират побрзо од кога било во минатото.

Оваа пандемија е во период кога информациите и дезинформации се лесно достапни, а ова, пак, води до жестоки дебати за тоа што е точно а што не. Сепак, експертите се луѓе кои цел живот изучувале болести и пандемии, па најдобро би било да се следат нивните совети и препораки.

На Земјата има повеќе луѓе

Денес планетата е понаселена од кога било, што значи има многу повеќе потенцијални заразени од претходните пандемии.

На пример, во 1918-та, се проценува дека на Земјата имало 1,8 милијарди луѓе, од кои 50 милиони починале од пандемијата. Денес сме над 7 милијарди луѓе, што значи дека доколку не ја контролиравме пандемијата и не преземавме ништо, веројатно ќе имаше многу повеќе заразени отколку во 1918-та.

Сè уште нема вакцина или групен имунитет

КОВИД-19 ги напаѓа сите луѓе, на секоја возраст, а експертите сметаат дека постои голема разлика помеѓу оваа и другите зарази.

На пример, кога станува збор за некои видови грип, бебињата и постарите се ризична група, но здравите млади можат да создадат таканаречен „групен имунитет“, што ќе ја спречи потенцијалната пандемија.

За КОВИД-19 сè уште немаме ваков групен имунитет, а вакцината допрва ја чекаме.

Медицината е многу понапредна

Ова се многу добри вести. Денес лекарите се поспремни од кога било да се справуваат со патогени и да прават лекови.

Корона вирусите се проучувани веќе 50 години, па научниците знаат многу за нив, а тоа значи дека многу полесно и побрзо можат да направат стратегија за лекување и развивање вакцина, отколку во минатото.

Светот никогаш не бил затворен како сега

Едноставно кажано, ниту една пандемија не го затворила светот како сега. Луѓето работат од дома, училиштата се затворени, откажани се сите важни настани… Се разбира, сето ова е за да се спречи пандемијата што е можно побрзо и максимално да се намали бројот на заразени, но и на жртви.

Спирова С. | Црнобело