Зошто работењето во канцеларија предизвикува дебелеење?

Многу луѓе чија работа бара седење пред компјутер во иста положба цел ден, порано или подоцна се соочуваат со качување на килажа.

Повеќето се свесни за тоа бидејќи ако 8 часа на ден седите во една положба и немате никаква физичка активност потоа, нормално е да очекувате дебелеење.

Ако досега сте ги занемарувале фактите, сега ќе се уверите кои се причините поради кои тоа се случува.

Проверете во колку ќе се пронајдете:

Ручек и непланирани оброци

Роденден на колега, или некој донел нешто од дома што зготвил, а вие секако мора да пробате од сѐ за да не ги навредите соработниците. А тоа секако значи неколку грама повеќе секојдневно.

Решение: Кога ја гледаме храната пред нас, сите јадеме повеќе. Подобро е да ги тргнете грицките или слатките од пред вас и културно да ги одбиете колегите ако не сте гладни. А на прославите, доволно е само малку да пробате од нешто.

Не обрнувате внимание што јадете

Наутро седнувате и појадувате нешто здраво што ќе си го купите или сте си го подготвиле од дома. Но, додека дојде ручек време, сфаќате дека многу сте работеле и сакате да се почестите со нешто, па нарачувате со колегите брза храна и си велите дека од утре сте на диета. Познато?

Решение: Водете си евиденција за храната која ја јадете. Запишувајте си ги оброците и планирајте ги однапред. Избегнувајте ги грицките и нездравите ужини. Ако знаете дека брзо огладнувате, земете си повеќе од здравата храна, не гладувајте.

Немате доволно светлина и канцеларијата е преладна

Според истражувањата ако немате доволно светлина во работната околина, потребата за јадење е поголема отколку во светла средина. Истото се случува и кога на телото му е поладно отколку што е нормално.

Решение: Поминувајте повеќе време на сонце. Излегувајте на паузи и прошетајте, а во канцеларија обидете се колку што е можно повеќе да ја осветлите просторијата. Во случај на студ, носете си нешто за наметнување.

Премногу работа

Постојаното размислување и работење ја зголемува нашата тежина од 2 причини. Првата е бидејќи немате слободно време да се посветите на физички активности заради обврските и уморот. Второто е поради недостаток на сон. Овие работи водат до зголемен апетит, без губење калории.

Решение: Зголемете ја вашата активност – не одете со лифт, одете по скали, пешачете до работа наместо да одите со автомобил или јавен превоз. И секако, не заборавајте дека доколку не е неопходно, не треба да останувате до доцна бидејќи треба да бидете наспани. Вежбањето помага за полесен сон.

Стрес и крајни рокови кои ја тестираат силата на вашиот нервен систем

Понекогаш работата не оди лесно и постојано сме нервозни и под притисок, а тоа нѐ тера да јадеме повеќе од нормалното (некои луѓе таму го наоѓаат спасот). Исто така телото ни бара повеќе храна поради шеќерите и мастите кои се потребни при справувањето со стресот.

Решение: Повторно, како што веќе ви е познато, решението е во физичката активност и доволниот сон. И запомнете дека храната не е решение на проблемите. Најдете начини да се релаксирате и опуштите, а не да јадете уште повеќе.

М. М. | Црнобело