Што се случува со мастиките кои ќе ги голтнеме?

Колку пати сте ја слушнале приказната „ако ја голтнете мастиката цревата ќе ви се залепат“? Колку пати само вашите родители ви ја кажале додека бевте деца? Но, и колку навистина е точна?

Сигурно до сега ви се случило повеќе од еднаш да проголтате мастика, намерно или не, па цревата и желудникот не ви се залепиле. Еве ја вистината за оваа тема...

Точно е дека секоја гума за џвакање содржи смола, восок, масти и емулгатори кои не се лесни за варење, но желудникот на човекот секојдневно консумира одредена количина храна која тешко се вари. Токму затоа, мастиките не се ништо необично или опасно по живот.

Во моментот кога ќе ја голтнете мастиката нејзините делови кои не може желудникот да ги свари остануваат во телото, а по одредено време, се исфрлаат од организмот.

Меѓутоа, приказните се и делумно точни ако се однесуваат за мали деца. Вистина е дека поголемиот број проголтани мастики кај дечињата може да создадат проблеми со варењето. Ова се случува многу ретко, но ако се случи, тогаш е потребна лекарска интервенција.

Сепак, ако сте возрасни нема за што да се грижите - желудникот сосема успешно ќе се избори со неа.