Лејди Гага за менталното здравје: „Мојот внатрешен глас згасна“

Детали

понеделник, 12 ноември 2018

Познатата пејачка и актерка Лејди Гага одржа моќен говор за време на „Patron of the Artists Awards“, кои ги организира фондацијата „SAG-AFTRA“.

„Се чувствувам како да не припаѓам тука, меѓу вас“, се обратила таа на присутните, алудирајќи на тоа дека е „премала“ за да може да биде во друштво на големите имиња.

„Овој говор го подготвував над три часови, размислував што да кажам и потоа си реков дека говорот е предолг и никој нема да ме ислуша“, започнала таа.

Сепак, иако говорот траел повеќе од 20 минути, Лејди Гага го доби посакуваното внимание од присутните:

„Губиме цели генерации млади луѓе кои не мислат дека нивните гласови вредат да бидат чуени. Потребата на овој свет за љубезност е парализирачка. Секој ден слушаме лоши вести, трагедии и тоа нè запира.

Но, ние треба да ги споделиме своите приказни, за глобалното ментално здравје да излезе од темнината. Опасно е и го знаеме тоа, бидејќи меѓу сите оние вооружени напади и насилства, имаше и таков зад кој стоеше ветеран со посттрауматско нарушување, што е ментална болест. Затоа и мораме да обрнеме внимание.

Кога зборувам за ментално здравје, особено за своето, опкружена сум со молк или со фанови кои ми ги шепотат своите мрачни тајни. Мораме да ја пуштиме светлината врз менталното здравје.“

Лејги Гага открила и како морала да се соочува со посттрауматското нарушување, кое резултирало со хронична физичка болка, панични напади, фибромијалгија, акутна траума, суицидни мисли и мазохистичко однесување.

„Потоа следуваше период кога ја прифаќав секоја понуда за работа и не знаев да кажам 'не', затоа што мојот внатрешен глас згасна. Доцна научив дека тоа не е здраво. Немав спомени, само блиц-мемории и искуства кои лесно бледнееја.

Ви го кажувам ова затоа што за мене веќе беше доцна. Сакам барем да имав повеќе извори за да научам за своите нарушувања.“

На овој говор се надоврзала и водителката Рејчел Блум:

„И јас страдам од анксиозност и депресија и сум благодарна на Бога што постојат лекови. Ја имам соодветната терапија затоа што можам да си ја дозволам. Ти благодарам Лејди Гага за твојот говор.“

Слушнете го целиот говор на Лејди Гага:

Е. Д. | Црнобело