Емпатијата и другарството во фокусот на караванот на Витаминка

Детали

четврток, 21 ноември 2024

Со едукација за општествените вредности како другарство, емпатија, почит, караванот на Витаминка продолжува низ скопските предучилишни центри. Низ музички претстави, игра и песна, децата учат за меѓусебното разбирање и за почитување на различностите, им се пренесуваат вредностите кои се клучни во градењето на личноста.

Содржините за караванот се создадени од тим од експерти, вклучувајќи педагози, психолози и едукатори, кои се погрижија активностите да бидат внимателно изработени и прилагодени за возраста на децата и воедно да ги содржат едукативните елементи.

Проектот е инициран од Витаминка, компанија што ја препозна важноста на едукацијата од најмала возраст и потребата од создавање позитивно влијание врз децата и заедницата, што е и целта на проектот и ја инкорпорира во својата општествена одговорност.

Оваа иницијатива за учење на општествените вредности уште од мали нозе го привлече вниманието на јавноста, родителите и образовните центри, ширум државата кои бараат карванот да се одржи и во нивното училиште. Досега карванот посети 15 предучилишни установи во Скопје, каде што се одржаа над 40 музички и едукативни претстави во кои беа вклучени околу 4000 деца.

Планирано е караванот да посети вкупно 80 установи низ целата држава, вклучувајќи градски, но и рурални средини, за да обезбеди секое дете да има можност да биде дел од ова уникатно искуство.