СинтЕЗа - платформа за креативно изразување и академска соработка

Детали

четврток, 24 октомври 2024

СинтЕЗа, мултимедијален настан организиран од Халкбанк, кој овој петок ќе се одржи во Јавна соба, претставува уникатна можност за студентите од седум факултети да ги спојат своите креативни идеи и научни знаења во заедничка платформа.

Настанот ќе ги обедини младите умови од различни академски дисциплини, кои преку уметност, технологија и наука ќе ги претстават своите визии за иднината и улогата на младите во општеството. Програмата на СинтЕЗа ќе опфати изложби, музички перформанси, филмски проекции и театарска претстава.

Професорите од различни факултети се согласни дека ваквите настани се клучни за развојот на младите професионалци. Доц. д-р Јелена Џокиќ од Машинскиот факултет ја истакнува важноста на креативноста во сите сфери на животот. „Креативноста не е само уметнички израз, туку и начин на размислување и решавање проблеми. Настани како СинтЕЗа се неопходни, бидејќи ги поттикнуваат студентите да излезат надвор од стандардните академски рамки и да ја користат својата иновативност во различни контексти“, вели Џокиќ.

Од друга страна, м-р Викторија Брндевска Стипановиќ, од Факултетот за шумарски науки, пејзажна архитектура и екоинженеринг „Ханс Ем“, потенцира дека студентите од овој факултет со нетрпение очекуваат да ги презентираат своите проекти, кои претставуваат уникатна комбинација од уметност и наука. „Во денешно време, кога враќањето на контактот со природата е од суштинско значење за човековата благосостојба, овие проекти покажуваат како пејзажната архитектура може да придонесе за решавање на современите предизвици“, додава Брндевска Стипановиќ.

Особено инспиративна е паралелата со нејзините студентски денови, кога речиси и да немало вакви настани. „Последиците од тоа сè уште се чувствуваат – тоа се гледа во неинволвираноста на многу професии во значајни процеси за креирање на општеството, што доведува до одредени неуспеси. Сепак, никогаш не е доцна работите да се променат на подобро. Ја поздравуваме оваа иницијатива на Халкбанк, и ја истакнуваме потребата од уште повеќе вакви настани и иницијативи. Нашата одговорност е да им овозможиме на младите да се осознаат, да се промовираат и да се сплотат, бидејќи тие се движечката сила на општеството – силата која може да го подобри светот и да изгради стабилна и светла иднина", вели таа.

Овој настан е повеќе од обична изложба. Тој нуди можност на студентите да се изразат преку различни форми на уметност и наука, да ги запознаат иновациите на своите колеги од другите факултети и да ја разберат суштината на заедничката соработка како клуч за успех и напредок.

Славица Јанешлиева, декан на Факултетот за ликовни уметности, ја нагласува важноста на интердисциплинарната соработка и отворената комуникација. „Сметам дека треба да има повеќе и подолгорочни соработки како проектот СинтЕЗа, каде младите ќе се запознаваат и соработуваат. Во минатото, студентите од различни факултети сами иницираа вакви соработки преку свирки, изложби и други продуктивни дружби. Денес, животот е исполнет со премногу информации и премалку квалитет, па токму ваквите настани се важни за нивниот развој.“

Јанешлиева додава дека поттикнувањето соработка меѓу уметноста, науката и технологијата е неопходно. „Слободата и љубопитноста на умот се најважни, а интердисциплинарноста ја отвора вратата за нови можности. Важно е младите уметници и научници да излегуваат од своите комфорни зони и да се запознаваат со нови дисциплини. Но, најважно од сè е младите да ја имаат енергијата и да чувствуваат дека тие се доволно моќни со труд, знаење и добра идеја да влијаат на својата околина, да  го променат општеството, па дури и  светот.“

На СинтЕЗа, Халкбанк ќе понуди и Happy hour конзумација, наменета за сите корисници на пакетот за млади – Halk EZ (Halk Easy). Овој пакет е дизајниран да одговара на динамичните потреби и на животниот стил на младите луѓе. Покрај најдобри услови за дигитално банкарство, финансии и можности за плаќање, тој вклучува и бројни додадени вредности за младите кои се корисници на пакетот.

Дополнително, HalkEz платформата преку финансиска едукација, организација и поддршка на културно - забавни настани, како и преку реализација на еколошки практики за заштита на животната средина, делува и во поширока, општествена корист за младите.

СинтЕЗа е од отворен карактер, а влезот е слободен за сите посетители.

Деталите за програмата може да ги проследите на: Инстаграм