Нова голема инвестиција: Веро отвори најсовремен маркет во трговскиот центар „Дајмонд“ во Скопје

Детали

петок, 20 октомври 2023

Интензивниот период на нови, големи инвестиции за 2023 година Веро го заокружува денеска со свечено отворање на нов Веро маркет во трговскиот центар „Дајмонд“ во строгиот центар на Скопје. Станува збор за современ Веро маркет, изграден и опремен според највисоките светски стандарди и трендови во малопродажбата кој нуди ново потрошувачко искуство за сите генерации.

Маркетот се простира на површина од 2.000 метри квадратни, лоциран на атрактивна локација на приземјето од новоотворениот трговски центар. Новиот Веро маркет нуди голем асортиман на производи од домашни и странски добавувачи, ексклузивни производи, а на потрошувачите на располагање им се и специјализираните оддели за свежо овошје и зеленчук, месарница, рибарница, оддел за готвени јадења, деликатеси, како и пекарница со свежо приготвени печива секој ден. Во новоотворениот маркет се вработени 60 лица кои му се придружија на големиот тим на Веро. Маркетот во „Дајмонд“ ќе работи од понеделник до сабота од 8 до 22 часот, а за да ги задоволи потребите на потрошувачите ќе биде отворен и во недела од 10 до 20 часот.

Со отворањето на новиот маркет, Веро ја достигна бројката од 14 модерни маркети во четири градови низ земјава – Скопје, Тетово, Битола и Куманово. Новиот проект во „Дајмонд“ е продолжување на амбициозниот инвестициски план на менаџментот на Веро за оваа година. Пред само неколку месеци, Веро свечено отвори најсовремен маркет во Куманово, со што го додаде и овој град во својата мрежа, а ги финализираше неколкумесечните активности за модернизирање на маркетот во скопската населба Тафталиџе. Експанзијата на брендот низ земјава ќе продолжи и во следната година, кога е планирано отворање на Веро маркет во Струмица.  

Плановите за проширување на нашата мрежа маркети беа присутни од поодамна, но периодот на ковид-кризата малку ја забави нивната реализација. Затоа сме особено горди што по надминување на тој предизвик, за кратко време, во иста година отворивме два нови, најсовремени маркети, со кои нашето портфолио достигна вкупно 14 Веро маркети во четири градови во земјава. Следната година планираме да го прошириме присуството и во источниот дел на земјава, а нашата експанзија ќе продолжи и на други локации. Нашата долгорочна цел е на потрошувачите да им овозможиме пазарување во кое максимално ќе уживаат и да им понудиме ново искуство за целото семејство – вели Петар Денковски, генерален директор на „Веро“.  

Веро е пионер на модерната малопродажба во земјава, бренд кој е присутен на домашниот пазар веќе 26 години. Покрај на македонскиот пазар, Веро успешно работи и на пазарот во Србија.