Заедно до средно Водно – рекреација и поддршка во борбата против дијабетес

Детали

петок, 08 ноември 2019

Во текот на утрешниот ден, 9ти ноември од 10-13 часот, Сојузот на здруженија на дијабетичари организира настан за сите љубители на спортот и здравите животни навики, со цел да се подигне свесноста за дијабетесот, како и да се едуцира општата јавност за важноста на семејството во третманот и разбирањето на и потребите на лицата со дијабетес.

Рекреативното искачување на Водно е дел од овогодинешните активности поврзани со Светскиот ден за борба против дијабетес. Настанот започнува со средба на учесниците во 10:00 ч. пред О.У. „Кочо Рацин“ по што планирано заедничко искачување до средно Водно. За секој учесник предвидена е редовна контрола на гликемиите, како и пакет за освежување. Оние кои не можат да испешачат, може да ги искористат редовните автобуските линии на ЈСП и да се придружат на паркингот на средно Водно каде продолжува дружењето. На искачувачите ќе им се придружи и група од  велосипедисти, поддржувачи на борбата против дијабетесот, кои со симболична кружна рута преку средно Водно и Пантелејмон до О.У.,,Кочо Рацин“ ќе го извозат т.н. син круг кој е всушност знакот на лицата со дијабетесот.

Уште една одлична можност за сите ентузијасти и љубители на рекреативното планинарење да го искористат викендот за рекреација, но и активно да се вклучат и да ја поддржат иницијативата. На настанот ќе земат учество и претставници на разни компании, како и секој оној кој доброволно сака да се приклучи и да даде поддршка.