Нашата докторка Марија Бунда Калпак почина од рак на дојка, но нејзината мисија не заврши: „Жени, проверете си ги градите“

Детали

четврток, 03 октомври 2024

Марија беше личност која многумина ја паметат не само по нејзината стручност, туку и по нејзината насмевка, позитивна енергија и неверојатен дух, кој носеше ведрина, мотивација и инспирација да се пребродат дури и најтешките животни предизвици.

Нашата докторка Марија Бунда Калпак отворено говореше за нејзината борба со ракот на дојката, обидувајќи се да ја подигне свеста за оваа болест. Таа оваа тешка дијагноза ја доби на само 28 години.

И иако борбата со оваа болест ја изгуби прерано, во кобниот јули 2023-та, во сите години на борба таа јавно говореше за да охрабри и други жени кои се соочуваат со истата дијагноза.

Постојано ја испраќаше пораката: „Жени, проверувајте си ги градите“.

Нејзината порака, нејзината насмевка и енергија ќе останат запаметени.

Оваа мајка, сопруга, ќерка остави трага, а сега нејзината мисија ја продолжуваат нејзините сакани со отворање на Инстаграм профил (насловен како M says: Check your boobs) во нејзина чест.

Во описот на профилот стои: Иницијатива за подигнување на свеста против рак на дојка во чест на д-р Марија Бунда Калпак.

Профилот е отворен токму во розовиот октомври - месец посветен на подигање на свеста за ракот на дојка.

На профилот пишува:

„Во чест на Марија Бунда Калпак и со голема гордост ја продолжуваме иницијативата што ја започна – нејзината мисија за подигнување на свесноста за ракот на дојка.

Oвој Инстаграм профил ќе биде платформа за споделување активности, настани и едукативна содржина за превенција на рак на дојка.

Марија го создаде овој мотивирачки слоган кој и денес повикува на акција.
Да продолжиме таму кајшто застана младата докторка Марија Бунда Калпак, која отворено ја споделуваше својата приказна со цел да ја подигне свесноста за карциномот на дојка.

Марија беше личност која многумина ја паметат не само по нејзината стручност, туку и по нејзината насмевка, позитивна енергија и неверојатен дух, кој носеше ведрина, мотивација и инспирација да се пребродат дури и најтешките животни предизвици.

Сега сите заедно да дејствуваме во розовиот октомври и да ја продолжиме нејзината мисија. Check your boobs (проверете ги вашите гради) потсетува да бидете свесни за важноста од редовна самоконтрола, бидејќи ракот на дојка може да се превенира!

„Целта ми е да ја издигнам свеста за навремено откривање, па така секој еден преглед што ќе го поттикнам е голема среќа за мене”, изјави Марија во една пригода.

Нејзината цел отсега е и наша цел!

Придружете се на оваа иницијатива и не заборавајте: Check your boobs (проверете ги вашите гради)!“

С. С. | Црнобело