Летниот распуст го искористиле за правење училница на отворено – како треба да учиме од Босанците?

Детали

понеделник, 14 септември 2020

Наместо да го губат времето непотребно, Босанците летниот распуст го искористија за создавање училници на отворено, па сега учениците можат безбедно да посетуваат настава без маски, а притоа никого да не загрозат – зошто не се смисли вакво нешто и кај нас на време?

Голем број од родителите на малите деца не се сложуваат со идејата тие да носат маски додека се на настава, а пак, долго време поминато во затворена просторија без никаква заштита, дефинитивно не е идеално решение за заштита од корона вирусот.

Посебно во зимските месеци, кога нема да биде лесно возможно постојано проветрување на училниците, децата, а и наставниците ќе бидат загрозени доколку не носат маски. Од друга страна, цела година помината онлајн влијае лошо на социјализацијата на децата, но и на квалитетот на наставата. Идеално решение не постои, но мора да се најдат начини што подобро да се започне и реализира успешно школската година.

Босанците не губеле многу време летово и навреме си испланирале како безбедно учениците да посетуваат настава, а нивната генијална идеја стигна и до светските медиуми.

Наставниците од основно училиште во Качуни, го искористиле распустот за да создадат училница на отворено, а овој проект започнал со минимален буџет кој набрзо привлекол помош и донации од страна, а општината дала материјали за изградба.

„Нашиот модел овозможува дишење свеж воздух за настивниците и учениците. Можеме слободно да зборуваме и да работиме, без да се гушиме. Се гордееме“ – вели Мирза Беговиќ, наставник по јазици во училиштето.

Наставниците направиле клупи од дрво и ги поставиле како во амфитеатар, а создале и платформа каде ќе стои наставникот како и ѕид од цигли на кој е закачена табла. Истовремено засадиле и многу дрвја, со што ја претвориле отворената училница во идеално еко-катче.

Одделенијата се распоредени во неколку групи за сепак учениците да можат да одржуваат безбедна дистанца додека се на час, а се работи на принцип на ротација, па некои ученици ја следат наставата онлајн додека другите се со физичко присуство.

Носењето маска е задолжително при доаѓање и заминување од училиште, но не и за време на часовите, бидејќи сите се на безбедна дистанца, плус на отворено.

Фотографиите од ова генијално решение вирално се проширија насекаде и дефинитивно е за пофалба.

Ќе беше идеално доколку летото се искористеше и кај нас на тој начин, па наставата да започнеше со физичко присуство на отворено додека временските услови го дозволуваат тоа, а во меѓувреме да се развива платформа за онлајн настава во зимските месеци.

Така децата ќе беа помотивирани, ќе беа колку што дозволуваат условите социјализирани, а сепак заштитени. Што мислите за ова? Можеби уште не е доцна за второто полугодие во пролетните месеци. 

М. М. | Црнобело