Има 23 години и дом како од '90-тите – дал 6.000 евра за ретро апарати и мебел од ИКЕА
- Детали
- среда, 13 октомври 2021
Џек Волтер смета дека ’90-тите се најдобрата деценија, па потрошил 6.000 евра за да го претвори неговиот дом во временска капсула од тој период, опремена со касетофон, мебел на старо од ИКЕА, стар телевизор и ретро кујнски апарати.
Џек Волтер од Англија е вљубен во ’90-тите, а досега потрошил околу 6.000 евра за да го трансформира неговиот дом во еден вид временска капсула од оваа ера.
Сега, домот на Џек е опремен со мебел од ИКЕА купен на старо, стар телевизор од 90-тите, касетофон, па дури и ретро кујнски апарати.
23-годишното момче вози и стар автомобил – Austin Mini Metro – а од облека најмногу му се допаѓаат класичните Levi’s фармерки и џемперите кои биле најголем хит во ’90-тите, но и широките џемпери препознатливи за истиот период.
Џек вели дека на некој начин се обидува да ја долови топлата атмосфера од неговиот дом од детството, но признава дека неретко луѓето го нарекуваат „луд бидејќи не живее во сегашноста“.
Џек живее во англиско село и вели дека поради локацијата, има проблеми со мрежата на мобилниот, но затоа, пак, има ретро фиксен телефон кој редовно си го користи.
„Сè започна кога се обидував да го копирам домот од моето детство. Никогаш не ми се допаѓале модерните домови со сива боја. Оваа куќа не ја чувствував како дом, па сакав да го променам тоа.
Кога се вселив пред две години беше монотона и бела. Од 1995-та, немало никакви реновирања во куќата. Единствено беа сменети подовите и ѕидовите беа офарбани бели. За да ја средам, купував многу работи на старо и онлајн. Добивав и многу подароци од луѓе кои ме знаат“.
Џек навистина живее во 1990-тите, па дури и слободното време го минува со серии од тој период кој ги гледа на касети, како и музика од истата ера којашто ја слуша на неговиот касетофон. Тој има и стар мобилен телефон и стар лаптоп со оперативен систем Windows ’95.
Џек е всушност убеден дека ’90-тите имале совршена рамнотежа кога станува збор за технологија – доволно колку да нè забавува, но не премногу за да се изгубиме во неа.
Најстариот предмет во неговиот дом е телевизорот произведен во 1980-тите, за кој платил околу 160 евра.
Бидејќи Џек живее со мајка му, во неговиот дом сепак има и неколку „модерни“ работи, најмногу поради неа.
„Имам неколку модерни уреди. Живеам со мајка ми, па таа има модерен телевизор. Имаме и нова машина за садови и нова перална, но мислам дека тоа е сè.
Ми се допаѓа и што живееме во мало село. Има едвај 500 луѓе и од кој прозорец и да погледнам, има само полиња“.
Џек споделува видеа на ТикТок од неговиот дом и вели дека собрал многу следбеници поради носталгијата.
„Почнав да користам ТикТок бидејќи ми беше досадно за време на карантинот. Со текот на времето луѓето почнуваа да ми кажуваат дека се сеќавале на предметите што се во мојот дом и многу од нив ми рекоа дека ја чувствуваат истата носталгија кон ’90-тите“.
„Ова ми е како бегство од модерниот свет. Некои луѓе одат во теретана, некои играат видеоигри. Ова е моето бегство“.
Џек истакнува и дека забележал дека ретро уредите му траат подолго.
„Луѓето ми велат да сум купувал нови работи бидејќи се поквалитетни. Според мене, вака ми е поевтино и секој предмет во мојот дом има приказна. А, и овие уреди и предмети траат многу повеќе. Сите забораваат дека порано луѓето ги купувале работите за да им траат“.
Повеќе фотки од домот на Џек на следната страница...
Би можело да ве интересира:
Препорачуваме
Најчитани неделава
