Совршен стилски „шмек“: 5 најпопуларни модели на очила за сонце за оваа пролет

Очилата за сонце претставуваат мал додаток со навистина големо влијание – особено во топлите претстојни денови.

Со додавање на ова стилско, а воедно и практично парче секој може да изгледа сосема „шик“ и трендовски.

Без разлика дали ги носите очилата 24/7 или едноставно ги користите за комплетирање на облеката, тие се совршено едноставен начин како да го изведете крајниот допир на вашиот излед.

Овој незаменлив моден додаток најчесто го избираме според обликот на лицето, за добро да ни прилега, но во секој случај ви предлагаме да „ѕирнете“ и да дознаете кои модели ќе бидат вистински тренд оваа година.

Во продолжение ги издвојуваме 5-те најпопуларни модели на очила за сонце за пролет 2022:

Очила со бели рамки

Веројатно на социјалните мрежи сте забележале дека правоаголните, „ретро“ очила за сонце вирално се враќаат во мода.

Рамките на овие модели најчесто доаѓаат во бела боја, а тоа е една од причините зошто дамите ги обожаваат, бидејќи можат да ги комбинираат со речиси секое парче од нивниот плакар.

Гломазни очила

Во последните неколку месеци овие очила станаа апсолутен хит. Најпрво почнаа да ги носат ѕвездите како Ким Кардашијан, а набрзо го преплавија светскиот пазар, па пристигнаа и кај нас.

Судејќи според фотографиите на социјалните мрежи, овие очила за сонце моментално се тренд број еден.

„Ленонки“ во боја

Кога некој ќе каже „Ленонки“, повеќето луѓе мислат на тркалезни, мали црни очила за сонце.

Ваквите „Ленонки“ беа вистински тренд во деведесетите, а денес постојат толку многу модификации - со што навистина е тешко да се избере најубавиот модел.

Животински принт

Годинава излозите ќе бидат украсени со патики, кошули, здолништа, фустани и маици со мотиви на зебра, тигар, леопард и змија.

Покрај овие парчиња облека, модните експерти одлучија очилата за сонце со животински дезени да бидат задолжителен тренд за пролетта 2022 година.

Мачкести очила

Во последните години ниту еден тренд поврзан со очилата не можеше да помине без мачкестите рамки.

Класично, а и модерно – тоа е комбинација која ги отвора сите врати, особено за дамите кои сакаат да истакнат некои делови од лицето, како што се јаболчниците.

Мила М. | Црнобело