„Се преселив од Ирска во Токио пред 4 години – што ме изненади најмногу?“

Многу кафетерии отвораат дури на пладне

Во повеќето земји, вклучувајќи и кај нас, кафетериите се отворени од 9-10 часот наутро.

Но, Дејвид вели дека поголемиот дел од кафетериите во Јапонија не отвораат пред 11 часот. Некои отвораат дури и во 14 часот попладне.

Јапонската кујна е многу разновидна

Сушито и нудлите се најпопуларните јапонски јадења, но Дејвид истакнува дека јапонската кујна нуди и многу други вкусни јадења.

„Токио е градот со најмногу ресторани кои имаат Мишелин ѕвезди – над 200. Многу од нив се со прифатливи цени. Имам најдено ресторани со Мишелин ѕвезда во кои еден оброк може да чини само 10 или 20 долари“.

Јапонците имаат поразлични бон-тон правила

Дејвид вели дека Јапонците генерално не сакаат физички допир, што значи дека ракувањето и прегратките се неприфатливи, дури и помеѓу луѓе кои се познаваат.

„Кога пробував да се ракувам со некого, луѓето едвај ми ја допираа раката. Сега знам дека треба да се поклонам – традиционален гест за покажување почит – пред да ја подадам раката.

Ако сум на поформален настан, луѓето се претставуваат така што даваат нивна визит-картичка. Научив и дека треба да ја земам картичката со двете раце, но и да не ја ставам веднаш во џеб бидејќи тоа може да биде знак за непочитување.

Многупати ги имам погрешено овие правила, но многумина сфаќаат дека сум странец и ми простуваат“.

Малку луѓе разбираат англиски

Англискиот стана универзален јазик и го користиме сите кога сме во странство. Но иако Токио е еден од најразвиените градови во светот, малку луѓе знаат англиски.

Поради ова, Дејвид нагласува дека мора да знаете барем малку јапонски ако сакате да се снајдете.

Времето е многу непредвидливо

Во Токио зимите можат да бидат многу студени, а летата пеколно жешки.

„Дури и како личност која доаѓа од студената Северна Ирска, сметам дека зимата во Токио е смрзнувачка. Температурите можеби не се многу ниски, но се чини многу студено поради сувиот воздух.

Во лето, температурите се искачуваат над 33 степени и влажноста на воздухот е многу голема. За личност која е бела како мене, летото може да биде неподносливо.

Покрај честите промени на времето, Токио се соочува и со тајфуни и земјотреси“.

Спирова С. | Црнобело