9 трикови со кои ќе ги обесхрабрите крадците да провалат во вашиот дом

Иако има многумина кои сè уште мислат дека кражбите на домови се случуваат само на филмови, сепак тоа е многу реално и се случува и кај нас.

Секако, не треба да размислувате и да се плашите од тоа, но не мора и да се водите по фразата „кој ќе ме ограби мене“, па да ги „каните“ крадците во вашиот дом со отклучени врати.

Добро е да бидете претпазливи и барем кога одите на пат, да направите нешто со што ќе избегнете вашиот дом да биде жртва на кражба.

Во продолжение прочитајте неколку ефективни трикови со кои ќе ги обесхрабрите крадците да провалат во вашиот дом:

Скријте ги вредните и скапоцени предмети кога имате непознати во домот

Кога имате мајстор кој поправа нешто во домот или не толку познати луѓе на гости, немојте да ги вадите сите важни предмети и скријте ги скапоцените работи кои ги привлекуваат очите и рацете на крадците.

Не дозволувајте крадците да слушнат ѕвонење на телефон

Иако во денешно време ретко кој има фиксен телефон, крадците ги „снимаат“ овие работи и користат стари трикови каде што може да им успее.

Тие ѕвонат на домашниот телефон и чекаат да видат дали некој ќе се јави, ако не се јави, значи дека е празно.

Но, ако го изгасите ѕвонењето, ќе ги збуните кога нема да слушнат звук и веројатно нема да ризикуваат.

Заштитете ги прозорците

Ако живеете на првите катови кои се блиску до приземје, вреди да ги заштитите вашите прозорци и да ставите решетки.

Грижете се за околината на вашиот имот

Ако живеете во куќа, не ја запуштајте околината за крадците да помислат дека никој не живее таму и да им дадете простор за криење – одржувајте го дворот и патеката чисти и средени.

Искористете ги нивните стравови против нив

Повеќето крадци се плашат да бидат фатени, па ако не се од оние најхрабрите, ќе се исплашат од знак кој укажува на заштитен објект или доколку видат камера.

Фрлајте ги кутиите од скапи производи паметно

Кога фрлате кутии од лап топ, таблет, телевизор и слични вредни предмети, не дозволувајте некој што ја прати ситуацијата да знае што сè имате дома.

Уништете ги кутиите пред да ги фрлите за да не привлекувате крадци.

Преправајте се

Ако видите сомнителни ликови кои се врткаат околу, а треба да го напуштите домот и да го оставите празен, слободно свртете се и мавнете кон прозорот како да има некој дома, или на заклучување само кажете „чао“.

Оставете да влегува светлина

Ако ги оставите завесите и ролетните од прозорците целосно затворени неколку дена, веднаш е јасно дека нема никој дома.

Растенија со боцки на влез

Ставете растенија кои имаат бодликави гранки пред оградата и под прозорците, за мисијата да биде потешка.

М. М. | Црнобело