Џебови, ладни места, под перница: Каде не треба да го чувате телефонот?

Денес телефоните на сите ни се нешто без што не можеме да си го замислиме денот, а многумина, дури и ноќта.

Целосно сме приврзани за нив и не ги испуштаме од раце – ги носиме секаде со нас, дури и во бања и во кревет додека спиеме.

Тешко е да се најде некој кој не е толку зависен од телефонот, а оние ретките, сите треба да им се восхитуваме и да земеме пример од нив.

Па, кога веќе е така, добро е да се знаат и некои научно поддржани факти за негативните влијанија од или на телефонот.

Дознајте на кои сѐ места не треба да го чувате телефонот:

Заден џеб

Ако имате навика телефонот да го ставате во задниот џеб на панталоните, следниве причини можеби ќе ве разубедат:

• Телефонот има екран на допир кој реагира и на други работи освен нашите прсти, па можеби ќе притиснете нешто што не треба или ќе заѕвоните на некого.
• Ако чувствувате болка во нозете и стомакот, тоа може да е последица на телефонот кој постојано го чувате во џеб.
• Многу лесно може телефонот да ви падне, да го скршите, изгубите или да ви го украдат.

Преден џеб

Мажите ретко носат чантички, па најчесто телефонот го ставаат во преден џеб. Но, нивното здравје може да пати од оваа лоша навика. Истражувањата покажуваат дека електромагнетната радијација од телефонот, влијае на квалитетот и квантитетот на спермата.

На колковите

Според истражувањата, држењето на телефон близу половината (џеб од јакна) ги ослабува коските на колковите.

До кожа

Бактериите од телефонот многу брзо се пренесуваат на кожата, па обидете се да не го допирате и да не доаѓате во директен контакт со нечистотии. Кога ќе зборувате, оддалечете го 0.5-1.5 cm од кожата на лицето.

На ладни места

Ако е ладно и температурата паднала под 0-та, не заборавајте и на вашиот телефон. Не го оставајте предолго на ладно, како на пример во автомобилот или во рака додека вие со часови шетате надвор покриени со шалче и капче.

Кога правите промена од топло на ладно место, се создава кондензација, а ако ова се случува пречесто, може да доведе до внатрешни проблеми со телефонот.

Топли места

Високите температури се исто така лоши за електронските уреди и не е препорачливо да го чувате до извор на топлина.

Количка за деца

Мајките кои се во брзање, често го оставаат телефонот во количка, но некои истражувачи тврдат дека е ова небезбедно и дека телефоните може негативно да влијаат на однесувањето и хиперактивноста на децата.

Под перница

Веќе на сите ни е познато дека не треба да спиеме со телефонот, а дел од причините се следниве:

• Навечер, кога стигаат нови нотификации, екранот најчесто се осветлува, а тоа влијае на лачењето на мелатонин, што може да доведе до проблеми со сонот.
• После долг временски период, електромагнетните зрачења предизвикуваат главоболки и вртоглавици.

М. М. | Црнобело