„Мајска Сесија“ на платото пред УКИМ: Македонските хитови добиваат ново руво по повод Денот на Европа

Детали

вторник, 21 мај 2024

На 22 мај, Јуроп хаус организира уникатен музички настан по повод Денот на Европа под наслов „Мајска Сесија“. Посетителите на платото пред Универзитетот „Св. Кирил и Методиј“ од 20 часот ќе имаат можност да бидат дел од незаборавно патување низ македонската музичка историја преку изведбите на стари хитови од страна на најактуелните и најпопуларни млади музички таленти.

Песните ќе бидат изведени од неколку од највозбудливите млади таленти на македонската музичка сцена, како Фанк Шуи, Пијан Славеј и Дина Јашари, заедно со Sethstat feat. Марија Каева и Ретро Кабаре. За дополнителна забава ќе се погрижат DJ Goce & LD Pistolero, кои како и секогаш ќе се погрижат забавата да добие уште повисок интензитет. Секој изведувач ќе понуди интерпретација во свој стил на дел од најпознатите македонски мелодии, обединувајќи ја традицијата и современоста во едно.

Целиот настан ќе биде водена од легендарниот радио водител Драган Б. Костиќ, кој ќе ги најавува преработките на хитовите од популарните Бастион, Леб и Сол, Маја Оџаклиевска, Балкан Експрес, Драган Каранфиловски Бојс, Ерзана, Нина Спирова и многу други. Покрај музиката, настанот ќе нуди и книжевен саем, винил поп-ап продавница и избор на гастрономски уживања, кои ќе ги задоволат различните вкусови на посетителите. Овие активности планирани се да започнат во 18 часот.

Организаторите ветуваат вечер на одлична забава: „Сите оние кои сакаат да го доживеат ова несекојдневно музичко и културно искуство - ова е прилика која не се пропушта. Дојдете да се преслушаме и да уживаме во пулсот на минатото вкрстен со креативноста на младината, и тоа во срцето на Скопје.“ – изјавуваат од Јуроп хаус.