Ако сакаш да си богат цел живот - одгледувај луѓе

Детали

петок, 29 јуни 2018

Повеќе од 350 присутни на седмиот настан од акцијата Feed Your Brain во Домот на културата „Антон Панов“ во Струмица ги слушнаа успешните приказни и мотивирачки пораки на гостите говорници: Зоран Витанов, Игор Трајковски и Влатко Лозаноски.

Тие успеја да ја пренесат својата порака дека и тука, во Македонија, може да се креира, но и задржи успешна кариера, доколку се вложиш себеси во она што го работиш и се потрудиш да бидеш најдобрата верзија од себе.

- Не е опасно да си песимист. Кога си песимист ти си штетен сам по себе. Но, кога си реалист, ти не си само штетен по себе оти поставуваш мали цели и се задоволуваш со малку, туку не дозволуваш некој да успее, оти ќе ти покаже дека можеш и повеќе – порача Зоран Витанов,  потпретседател на Lyconet International, основач на ЦЕФЕ Македонија, претседател на Асоцијација на менаџери на Македонија, економист и познат мотивационен говорник помеѓу претприемачите и менаџерите.

За креаторот и основач на најголемиот македонски агрегаторот за вести Time.mk, пак, Игор Трајковски, како граѓани на Македонија ние имаме многу повеќе потенцијал отколку што мислиме.

- Ние забораваме што сѐ имаме, а се фокусираме толку многу на што немаме! – порача тој.

Најблиските секогаш се тука да помогнат, посебно кога разочарувањето е најголемо, смета Влатко Лозаноски, кој додаде дека има многу фактори во текот на животот од кои учиме.

Нивните говори и целокупниот настан може да го погледнете на следниот линк:

Акцијата Feed Your Brain продолжува во Скопје. Осмиот настан е закажан за 13 јули, петок, во киното Cineplexx во Skopje City Mall со почеток во 18:30 часот. Гости говорници ќе бидат Весна Петрушевска Бејби, Тони Зен и Петар Георгиевски – Камиказа.

Настанот ќе биде отворен за сите кои се желни да се мотивираат и да добијат поттик за личен развој и да го остваруваат својот сон тука, во својата земја.

Сите заинтересирани може да се пријават ТУКА.

Модератор на настаните е Жарко Димитриоски, автор и водител на најпопуларното Македонско ток шоу, Еден на Еден и креативен директор во истоимената маркетинг агенција.

Акцијата „Feed your brain“ е реализирана од маркетинг агенцијата „Еден на Еден” во рамките на иницијативата „Мрдни со прст”.

Мрдни со Прст која е граѓанска платформа, чија мисија е да поттикне акција на размислување за индивидуалната одговорност и поголема граѓанската вклученост во решавање на општествените прашања кои сите нè засегаат, бидејќи секое мало мрдање со прст придонесува за големи резултати и промени. Иницијативата започна пред повеќе од една година и секој граѓанин, граѓанска иницијатива или организација може да стане дел од неа.