Македонскиот Евровизиски претставник Даниел Кајмакоски ја започна промотивната турнеја!

Детали

четврток, 16 април 2015

Со гостување во соседна Албанија, македонскиот евровизиски претставник Даниел Кајмакоски ја започна промотивната евровизиска турнеја во организација на Македонската Радио Телевизија.

Лобирањето започна од Тирана, кадешто на покана на националната Албанската  Радио Телевизија, Даниел Кајмакоски беше гостин во Дневникот на АРТВ, а имаше и повеќе интервјуа за радио и телевизиски емисии за албанскиот национален сервис.

Претставникот на Македонската евровизиска делегација , Авни Ќаили вели дека Даниел Кајмакоски бил пречекан со голем интерес и од пишаните медиуми, како Шекули, Газета Шкиптаре и други. 

Во текот на вчерашниот ден Даниел со својот тим престојуваше во Белград, на заедничко дружење со фановите и медиумите од Србија, организирано од страна на ОГАЕ Србија. Во централниот хол на шопинг центарот Ушче во 18 часот Даниел Кајмакоски се сретна со претставниците на Србија, Црна Гора, а на средбата присуствуваше и претставникот на Молдавија, Едуард Романиута, кој оваа година ќе го отвори Првото евровизиско полуфинале. 

Овој викенд Даниел Кајмакоски ќе престојува во Амстердам, Холандија, кадешто се одржува најголемиот промотивен настан по повод Евровизија, Eurovision in concert. Дваесет и четири евровизиски претставници ќе земат учество на концертот кој ќе се одржи во салата Мелквек на 18-ти април, кадешто и Даниел Кајмакоски ќе настапи пред бројните фанови и евровизиски медиуми и ќе ја претстави во живо ″Autumn Leaves″.

Напорната агенда продолжува за Келн и Брисел, кадешто Даниел Кајмакоски ќе има гостувања во радио емисии.

Оваа година навистина се потрудивме да бидеме присутни на што повеќе промотивни настапи, па Даниел Кајмакоски ќе биде гостин и на гала забава во Москва, Русија, кадешто на 24-ти април ќе настапи со евровизиската ″Autumn Leaves″ во концертната сала Корстон пред  1000 гости, вели Мери Попова, шеф на Македонска Евровизиска Делегација.

Настанот ќе биде проследен не само од најзначајните руски, туку и медиуми од Белорусија и Азербејџан, па ова е исклучителна можност  Даниел Кајмакоски и нашата евровизиска песна да бидат забележани од што повеќе публика , додава Мери Попова.

Интерес за Даниел Кајмакоски има и во Виена, па нашиот евровизиски претставник е поканет да биде специјален гостин и во емисија на Австриската Национална Телевизија.