Работи кои мора да престанете да ги очекувате од другите

Кога имаме превисоки очекувања од луѓето околу нас си правиме повеќе лошо, отколку добро. Нема ништо корисно во постојано анализирање на нечие однесување кон нас и размислување зошто некој така се поставил или како може некој тоа да ни го каже.

Ако сакате да бидете посреќни, не очекувајте премногу. Бидете разумни и не ги сфаќајте работите премногу лично. Престанете да очекувате од другите дека:

Секогаш ќе бидат тука за вас

Кога конечно ќе се ставите себе на прво место, нема веќе да ве боли ако некој не е достапен во секој момент за вас.

Ќе се однесуваат со вас онака како што вие се однесувате со нив

Сé додека другите не станат свесни за нивното однесување кон самите себе, не очекувајте дека ќе се однесуваат нешто поразлично кон вас. Прифатете го фактот дека немаат сите ист морален код како вашиот.

Секогаш ќе ве разберат

Нема секој секогаш да ги разбере вашите животни избори и тоа е сосема во ред. Вие сте тие кои живеете со одлуките што ги носите и само вие разбирате зошто сте го одбрале тој пат.

Ќе ви ги читаат мислите

Ако некој ве познава, не значи дека знае што мислите и што сакате во секој момент. Кажувајте ги гласно работите кои ви сметаат или кои би сакале другиот да ги промени. Ако има взаемна љубов и почит, сé ќе се реши.

Ќе останат секогаш исти

Луѓето кои работат на себе се менуваат секојдневно. Не очекувајте дека ако некој толерирал некое ваше однесување или бил љубезен со вас одреден период, ќе биде сé уште ист. Не осудувајте. Не знаете зошто некој се променил.

Ќе ве сакаат ако вие не се сакате сами себе

Секој однос почнува и завршува со самите нас. Не ја барајте љубовта што си ја должите себеси на друго место.

М. В. | Црнобело