7-дневна ментална диета: Променете си го животот за една недела

Велат, физички се претвораме во она што го јадеме, а духовно, интелектуално и емоционално стануваме она што го мислиме. Седумдневната ментална диета е мошне едноставна, ама и исклучително тешка. Но, ако успеете, драстично ќе си го подобрите квалитетот на живот и ќе бидете позадоволни.

Менталната диета настанала во 30-тите години на минатиот век, како сламка за спас и помош на многумина во мрачните денови на „Големата депресија“. Применлива е и денес, во речиси неизменет облик.

Главните состојки се упорноста, преземањето одговорност и подготвеноста за промена. Доколку ја (из)држите една цела недела, ќе научите да управувате со своите мисли и чувства. Во значителна мера ќе го зголемите чувството на задоволство, среќа и контрола над сопствениот живот.

Не верувате? Обидете се!

Ова се правилата до кои треба да се придржувате:

1. Седум дена не смеете да си дозволите себеси да размислувате негативно подолго од 60 секунди.

2. Не само што не смеете да размислувате негативно, туку не смеете ни да говорите негативно.

3. Кога и да ви се појави негативна мисла, треба да ја пуштите да си замине, да не се занимавате со неа, или да ја замените со позитивна.

4. Доколку сте размислувале негативно подолго од една минута, диетата се прекинува и почнува одново, сè дури не постигнете континуитет од седум дена.

Како што можете да забележите, обидите за држење на диетата може да потраат и многу подолго од седум дена, односно траат сè додека не го постигнеме посакуваниот резултат, поради што е најдобро да почнете со неа што поскоро.

Покрај тоа што имате прилика да го вежбате својот ум, вежбате и дисциплина, а познато е дека дисциплината е клуч на успехот во остварувањето на било кој поголем предизвик и цел. Добрата вест е дека попатно може да јадете и пиете што и да сакате, уживајќи во сите благодети кои животот ги носи.

Предуслов за диетата е да научите да ги препознавате негативните мисли. Негативна мисла е секоја мисла за неуспех, разочарување, проблеми, критики, љубомора, завист, тешкотии, стравови, беспомошност и депресија, која не е конструктивна и не го решава проблемот. Вклучува и самосожалување, жалење на другите, негативни пророштва, загриженост поради болест, несреќа, незгода и било какви песимистички предвидувања.

Бидејќи низ главата на секој од нас поминуваат од 2 до 15 илјади мисли (некои тврдат и 50.000), не можеме да ја контролираме секоја негативна мисла, но можеме да одлучиме да не ѝ посветиме повеќе од 60 секунди.

Во продолжение, ви откриваме неколку совети и ментални стратегии како тоа и да го постигнете:

1. Намалете ја изложеноста на негативните вести на телевизија, во весниците и другите медиуми.

2. Кога сте во контакт со луѓе кои се жалат, негативни се и зборуваат лошо за другите, променете ја темата или пристојно повлечете се од разговорот.

3. Не им кажувајте на луѓето дека сте на ментална диета. Само обидете се да ја живеете.

4. Одредете позитивни слики со кои ќе ги замените негативните мисли. На пример, кога низ главата ќе ви пројде негативна мисла, можете да си ја повикате сликата на домашниот миленик, личностите кои ги сакате или некој омилен предмет, па минута до две интензивно да размислувате за тоа.

5. Насочете го вниманието на своето дишење, следејќи го неколку минути само вдишувањето и издишувањето, сè додека негативната мисла не си отиде.

6. Ако одеднаш ви дојдат повеќе негативни мисли, сетете се на некој позитивен настан кој ве очекува во блиска иднина. Можете да се потсетите и на одредени среќни спомени од минатото, па да ги оживеете во својата глава, користејќи слики, бои, звуци, вкусови или мириси.

7. Пронајдете нешто позитивно во сегашниот миг или ситуација, или, пак, трансформирајте ја негативната во позитивна мисла во својата глава. Запрашајте се: кога би морало да постои некое добро во сè, што би било тоа?

8. Запишете за што сè сте благодарни и на што можете да размислувате кога ви е тешко.  

9. Испејте го во себе рефренот од омилената песна, која ви го крева расположението. Бидете креативни. Направете што и да ви помага да не мислите негативно. Треба да издржите само седум дена!

Ако започнете со менталната диета, веројатно ќе почнете преполни со оптимизам и самодоверба. Меѓутоа, повеќето луѓе се откажуваат уште утрото, веднаш по појадокот, затоа што предизвикот им делува претежок.

Но, многумина од оние на кои им успеала диетата, најпрво доживеале неуспех. Не дозволувајте да се обесхрабрите! Тргнете од почеток, онолку пати колку е потребно, сè дури не успеете.

Доколку научите да ги контролирате своите мисли, ќе научите да го контролирате и своето однесување. Вашето однесување го гради вашиот карактер. Вашиот карактер ја одредува вашата судбина.

Среќно!

М. А. | Црнобело