Дали во вас се крие гениј? Големите умови имаат една заедничка особина

Знаете ли што имаат заедничко Чарлс Дарвин, Јохан Волфганг фон Гете и Марсел Пруст? Освен што биле генијалци, биле и чувствителни на бучава. Покрај тоа, за работата им била потребна потполна самотија, без луѓе, силна светлина или звуци.

Иако се верува дека оние кои лесно губат концентрација не се толку успешни во својата работа и не се многу креативни, новите истражувања покажуваат дека токму тоа е тајната на генијалните луѓе.

На креативните луѓе со висок коефициент на интелигенција бучавата им пречи повеќе отколку на оние кои имаат просечен IQ, потврдуваат некои психолози. Тие го проучуваат феноменот на „сензорски врати“, кој открива колку информации од околината може да продрат во еден момент во човечкиот мозок.

Мозокот најчесто ги филтрира непотребните информации, па луѓето кои имаат послаби „сензорски врати“ постојано се борат да ги елиминираат од свеста тие непотребни информации, како на пример чукањето на часовникот или гласовите кои се слушаат во далечина.

Научниците веруваат дека ваквата преголема чувствителност, всушност допринесува за креативна инспирација, бидејќи го проширува опсегот на внимание.

Луѓето кои впиваат повеќе информации од околината се склони да забележуваат нови и необични врски помеѓу различни информации.