Бизарна приказна: Сите детали за инфлуенсерката што лажела дека има рак на мозок и дека сама го лекувала

Бел Гибсон е една од првите Инстаграм инфлуенсерки која имаше над 300.000 следбеници – бројка што пред 10-тина години беше навистина голема. На своите следбеници Бел им кажуваше дека има рак на мозокот кој успешно го лекувала само со здрава исхрана и позитивни мисли. Но, набрзо се дозна дека Бел лаже и всушност им продава лажна надеж на луѓето болни од рак.

Бел Гибсон од Австралија беше позната блогерка и една од првите Инстаграм инфлуенсерки која тврдеше дека има рак на мозокот кој го лекувала со природни лекови и здрава исхрана.

На Инстаграм ја следеа над 300.000 луѓе, а издаде и книга со детали за тоа како го контролирала и лекувала ракот.

Но, сè што Бел „им продаваше“ на фановите беше огромна лага – таа воопшто немала рак на мозокот.

Како Бел успеала да измами толку многу луѓе?

Бел беше една од првите Инстаграм инфлуенсерки и се фокусираше на здравје. Бидејќи ја почна кариерата во период кога немаше многу конкуренција, до 2013 година стана мошне позната.

Таа имаше свој блог, како и Инстаграм профил со над 300.000 верни фанови.

На социјалните мрежи, Бел тврдеше дека има рак на мозокот кој не може да се оперира, а притоа споделуваше совети за здравје.

Во 2013-та, таа лансираше апликација со нејзините совети која била симната над 200.000 пати само во првиот месец. Притоа апликацијата беше прогласена за најдобра во својата категорија од страна на Apple Store.

Набрзо потоа, Бел издаде книга со рецепти и до 2015-та заработи над 1 милион долари од апликацијата и продажбата на книгата.

На својот блог таа отворено пишуваше за нејзината битка со ракот, а тврдеше и дека донирала над 300.000 долари во добротворни организации кои се борат против ракот.

Бел почна да дава и интервјуа во кои тврдеше дека имала рак на мозокот кој се проширил на матката, бубрезите и каде уште не.

Притоа, изјави дека сите ракови се појавиле поради некоја вакцина против рак на грлото на матката.

Според нејзината приказна, таа ја добила дијагнозата во доцните тинејџерски години и лекарите ѝ рекле дека ѝ остануваат само неколку месеци живот.

Но, по некое време, нејзините фанови почнаа да забележуваат дека нејзините приказни не се поклопуваат.

Бел велеше дека неколкупати правела операција на срцето, па дури и дека речиси умрела на операционата маса. Потоа тврдеше и дека доживеала мозочен удар.

За ова немаше никакви докази, а и следбениците на инфлуенсерката почнаа да забележуваат дека Бел нема ниту една лузна, и покрај бројните операции на срцето.

Најлошо од сè беше тоа што Бел тврдеше дека го контролира ракот со здрава исхрана и позитивни мисли.

Продолжува на следната страница...