Колкаво богатство остави Арета Френклин и зошто сакала да ѝ плаќаат само во кеш?

Детали

вторник, 21 август 2018

Нејзиното дело ќе остане како непроценливо историско наследство за идните генерации.

Арета Френклин почина на 76-годишна возраст и зад себе остави богатство од 80 милиони долари.  Пејачката, која го носеше прекарот „Queen of Soul“, имала необична практика - кога станувало збор за парите таа сакала да биде исплаќана само во кеш.

Извори блиски до неа тврдат дека неретко пред нејзините настапи во бекстејџот пред неа имала купчиња со стотици долари. Не пеела ако прво не била платена. Парите си ги ставала во чантата за која потоа се грижело нејзиното обезбедување.

Френклин наводно инсистирала да биде плаќана во кеш затоа што пејачите со темна боја на кожа, како Реј Чарлс и Би Би Кинг многу пати биле изигрувани и по настапите си заминувале со празни џебови.

Таа била претпазлива луѓето да не ѝ наштетат и не сакала да се соочува со ситуации на непочит кон неа.

Дури и во нејзините договори било нагласено дека луѓето што ја ангажираат мора физички да ѝ ги предадат парите. Имало случаи и кога ѝ биле исплаќани и по 25.000 долари на рака.

Музичката икона, која и највидните луѓе на светот ги доведувала до солзи со своите изведби, никогаш се нема појавено на листите на магазинот Forbes за најдоброплатени познати личности. За неа се вели дека имала почит од милијарди, но заработувала само милиони.

Oва делумно се должи и на фактот што се плашела од летање со авион и нејзините турнеи биле ограничени само на места на кои можела да појде со автобус.

Сепак, таа ќе остане една од најдобрите пејачки на сите времиња и остави музичко наследство кое нема да биде заборавено.

С. С. | Црнобело