Ученици од Кавадарци изградија дрвена куќичка за мачорот Тошо - тој е сега миленик во училиштето

Детали

понеделник, 10 февруари 2025

„Во училишниот двор се појави мало мачорче, мирно и дружељубиво, кое постојано одеше по вработените и учениците. Му дадовме име Тошо и тоа стана миленик на сите. Понекогаш го нема - но кога ќе се појават учениците и Тошо доаѓа - ги набљудува, ги испраќа на часови“, велат од училиштето за CRNOBELO.com.

Учениците во основното училиште „Тоде Хаџи-Тефов“ во Кавадарци, веќе 10 месеци имаат милениче кое го обожаваат сите.

Станува збор за мачорот Тошо, кој лани во мај се појавил во дворот на училиштето и останал таму, на голема радост и на учениците и на вработените.

Учениците, под менторство на професорите му изградиле дрвена куќичка од даски.

Па, денес Тошо живее во училишниот двор, но во својот мал и удобен дом.

Приказната за Тошо мачорот, од училиштето ни ја раскажаа за CRNOBELO.com:

„Некаде во мај месец 2024-та година, во дворот на училиштето се појави мало прекрасно мачорче.

Мирно и дружељубиво, постојано одеше по вработените и учениците.

Му дадовме име Тошо и Тошо стана миленик на сите - на директорката, на учениците и на голем број вработени.

Учениците од 8а и 8б одделение му направија прекрасна куќичка во која тој сега живее со својот пријател Гошо.

Сега Тошо е третиран и хранет, а крзното му е прекрасно.

Најинтересен момент е кога го бараме, а го нема - но кога ќе се појават учениците, Тошо одненадеж ќе се појави и ги набљудува, ги испраќа на часови.

Најголем дел од нив го галат, го префрлаат преку рамо, го ставаат во скут“.

Погледнете повеќе фотографии:

Повеќе фотографии на следната страница...