Гризнат тост, измислено другарче: Најчудните нешта кои биле огласени на eBay

Откако е измислен интернетот, речиси и не постои нешто што може да нè изненади.

На глобалните сајтови за продажба, како што е eBay, секојдневно се внесуваат илјадници огласи за работи кои луѓето сакаат да ги продадат. Најчесто станува збор за облека, предмети за домот или градината, книги и слично.

Но, има и огласи кои се навистина чудни, како на пример „го продавам значењето на животот“. Сигурно мислите дека огласот си стоел така, но овој „предмет“ е продаден за 3.26 долари.

Во продолжение погледнете дел од најчудните работи кои биле огласени на eBay:

Парче житарка

Во кутијата со житарки, еден човек пронашол парче житарка што му наликувала на јунакот ET од култниот филм на Стивен Спилберг. Житарката е продадена за 820 долари.

Гризнат тост

Кога гостувал во една радио-станица, пејачот Џастин Тимберлејк каснал малку од тостот што му го подготвиле и го оставил. Следниот ден, гризнатиот тост на Џастин се појавил на eBay и бил продаден за неверојатни 1.050 долари.

Чело како подвижна реклама

Ендру Фишер си го понудил своето чело како подвижна реклама за 30 дена. Компанијата SnoreStop го сметала овој потег за храбра, па го „купила“ челото на Ендру за да рекламира производи против ‘рчење.

Цел човечки живот

Иан Ашер, го фатила криза на средни години и решил целосно да го промени животот. Тој ставил оглас дека го продава целиот негов живот, што вклучувало огромна куќа, автомобил, предмети од домот, па дури и запознавање со неговите пријатели.

Со парите што ги добил, 384.000 долари, Иан прошетал низ светот и се преселил во Костарика.

Неуспешен спортски тим

По неколку разочарувачки сезони, американскиот фудбалски тим Indiana Firebirds бил ставен на продажба на eBay. На аукцијата, највисоката понудена цена била 3.9 милиони долари, што сепак не било доволно за да се продаде тимот.

Гратче во Америка

Гратчето Бриџвил во САД е првото гратче кое се продало на eBay. Првиот пат, еден од понудувачите на аукцијата понудил дури 1.8 милиони долари, но кратко потоа се откажал. Две години подоцна, Бриџвил бил продаден за 700.000 долари.

Измислено другарче

Откако психијатарот советувал еден 22-годишен студент да се ослободи од измисленото другарче Бернард, тој решил да го продаде на eBay. Но, мисијата била неуспешна бидејќи вработените во eBay го тргнале огласот.

Значењето на животот

Еден маж наводно го пронашол вистинското значење на животот и го ставил на продажба на eBay. Верувале или не, било продадено за 3.26 долари, но никој сè уште не успеал да дознае што тоа точно претставува.

М. В. | Црнобело