Коприви, остриги, похуван аспарагус: 10 најлуди натпревари во прејадување

Натпреварувањата на кои се јаде голема количина на храна имаат контроверзна репутација, а сепак се мошне популарни помеѓу одредени кругови на луѓе.

Способноста да се изеде што повеќе храна за што помалку време, истовремено предизвикува гадење, но и вчудовиденост. Постојат натпревари кои опстојуваат со векови, а постојано се појавуваат и нови.

Се движат од релативно симпатични, како што е натпреварувањето во јадење сладолед, до крајно шокантни, како на пример натпреварувањето на кое учесниците јадат ембрион од патка (?!).

Во продолжение, ви издвојуваме дел од најлудите натпревари во прејадување што се одржуваат низ светот:

Шампионат во јадење остриги

Се одржува секоја година во јуни во Њу Орлеанс, а победникот добива награда од 1.000 долари. Сепак, потенцијалните учесници треба да имаат на ум дека ќе мора да изедат 468 остриги во осум минути, колку што изел победникот од 2011 година, уривајќи го претходниот рекорд во таа дисциплина.

Светско првенство во јадење лук

Дали можете да замислите да јадете лук без други намирници, масло или сос? Токму тоа треба да го направите, ако сакате да се натпреварувате на првенството во селото Чидеок во англискиот округ Дорсет.

Светско првенство во јадење коприви

Термички необработената коприва ја пече и отекува кожата. Како натпреварувачите го „преживуваат“ овој предизвик, не знаеме. Станува збор за уште една локална специјалност на жителите на округот Дорсет во Велика Британија.

Натпревар во јадење кимчи

Првин да ве запознаеме со кимчи – во прашање е корејска ферментирана кисела зелка, со изразито лут вкус, а не така пријатен мирис. Интересен прилог е на супите и азиските крцкави салати, но речиси е невозможно да ја јадете во големи количини. Натпреварувањето се одржува секоја година во чикашкиот крај Кореатаун.

Натпревар во јадење пржени бургери

Во гратчето Коринт во американската држава Мисисипи, секоја година се одржува натпреварување за луѓе кои сакаат да јадат хамбургери. Меѓутоа, специјалитетите кои таму се служат се сепак поинакви од стандардните плескавици.

„Слагбургери“ претставуваат пржена мешавина од говедско месо и соја, се сервираат со свеж кромид, краставички и сенф, а со помфрит или похуван кромид како додаток. Рекордот на ова натпреварување го држи победникот кој изел 43 слагбургери во само 10 минути.

Натпревар во јадење кнедли со сливи

Конечно некое натпреварување на кое можеби и би се пријавиле. Натпреварот во јадење кнедли со сливи се одржува во Чешка. Чесите сакаат кнедли - толку мнoгу што еден од победниците изел 191 кнедла за време од еден час.

Кој може побрзо да изеде сиров кромид?

Рекордот го држи Брајан Дафилд од Велика Британија – тој изел кромид од 212 грама за една минута и 32 секунди.

Ембрион од патка – не, фала

Самото читање на информациите за овој натпревар предизвикува мачнина, па ќе го прескокнеме, но само знајте (доколку не сте можеле да претпоставите) дека „луѓето го прават и тоа“.

Натпревар во јадење похуван аспарагус

Што ли на луѓето нема да им падне на памет да похуваат? Што се однесува до помалку одвратните предлози, во калифорниското град Стоктон похуваат аспарагус и организираат натпреварување во консумација на истиот.

Натпревар во јадење путер

Дон Лерман го држи рекордот во консумирање путер – тој изел 700 грама солен путер во само пет минути. Не е потребна лажица, само го отварате путерот и натпреварот може да започне...

М. А. | Црнобело