Живеам во Стојаково - Првомајските трки со коњи, магариња и рачни колички се главен настан секоја година

Детали

недела, 28 април 2024

Зошто да го посетите Стојаково токму на 1-ви Мај? Зашто тогаш улиците се преполни: со стари кои си враќаат спомени од минатото, со млади кои имаат сјај во очите, но и со најмалите во кои лежи надежта за зачувување на иднината на селото.

Традицијата е од огромно значење за еден народ, а во денешно време, борбата за зачувување на она што ни е останато од нашите предци, е вистински предизвик.

Но, вложувањето труд и пренесувањето на обичаите од колено на колено, го негува духот на минатото и создава спомени вредни за паметење…

Со таков предизвик се соочени и жителите на село Стојаково, мало место во општина Богданци, каде веќе седум децении редовно се одржуваат првомајски трки.

Денес, жителите од моето село гордо зборуваат за трките кои вбројуваат трки со коњи, магариња, трки со велосипеди, улични трки, трки со вреќи, влечење со јаже, натпреварување со рака…

Во секоја дисциплина има награди за првите тројца учесници.

Изминатата година беше воведена уште една дисциплина, трка со рачни колички, каде што учествуваат по двајца: една личност седи во количката, додека друга личност ја турка до целта.

Насмевките и возбудата која ја носат трките не може да се раскаже, туку само да се доживее во единственото Стојаково.

Се знае како започнува првомајското утро: првото утринско кафе ќе биде испиено на центарот, зашто тука, на 1-ви Мај, секогаш имаме друштво и тоа бројни посетители кои ги бодрат натпреварувачите.

Несебичното и неуморното залагање на стојачани за сочувување на оваа традиција, е доказ за тоа колку е важно наследството од нашите татковци, дедовци.

Организаторите неуморно работат за да опстои секоја дисциплина, па, иако во минатото повеќе домаќинства од Стојаково чуваа коњи и магариња, а денес е намален бројот на учесниците во овие дисциплини, сепак, не се дозволува овие дисциплини да исчезнат, па се настојува настанот да биде како и досегашните.

Зошто да го посетите Стојаково токму на 1-ви Мај? Зашто тогаш улиците се преполни: со стари кои си враќаат спомени од минатото, со млади кои имаат сјај во очите и со најмали во кои лежи надежта за сочувување на иднината и традицијата на селото.

Во минатото, првомајските трки во Стојаково беа посетувани од познати личности, а оваа година, Стојаково повторно гордо ќе го пречека Игор Џамбазов, кој и самиот го изјави тоа, токму од центарот на Стојаково…

Стојаково е големата љубов на Игор Џамбазов, а сигурно ќе ја препознаете и неговата испеана „Стојаково блуз“, омилена на стојачани …

За да ја почувствувате магијата и искрената радост, треба да бидете дел од оваа манифестација.

Па, ако се двоумите каде за 1-ви Мај, тогаш патот нека ве води токму кон Стојаково, каде што ќе бидете со насмевка пречекани, а ќе заминете со спомени кои само овде може да ги добиете…

©CRNOBELO.com Забрането преземање и копирање. Крадењето на авторски текстови е казниво со закон.

М. Ѓ | Црнобело / фото: Фејсбук