Лажна глад: Ситуации во кои јадете, а не ви треба храна

Чувствувате ли „глад“ дури и кога не сте реално гладни? Не сте единствените. Честопати е тешко да се разликуваат вистинската од лажната глад.

Во одредени ситуации, телото јавува дека е гладно, а всушност не е. Тоа е само маска на вистинската состојба, која нема никаква врска со недостатокот на храна.

Па, имате силна желба да каснете нешто, иако оброкот не е она што му е реално потребно на организмот.

Резултатот е таложење на килограмите, коишто ужасно тешко е да ги симнете подоцна.

Честопати, лажната глад е производ единствено на човековата психа. Кои ситуации се најголеми непријатели за витката линија? Кога консумирате храна, а ви треба нешто друго? 

Во продолжение, прочитајте кои се најчестите видови на лажна глад, како и совети да се носите со секоја од нив:

1. Емоционална глад

Се наоѓате под стрес, досадно ви е, осамени сте, или, пак, чувствувате некаков страв? Луѓето неретко се прејадуваат од емотивни причини, разочараност, или, пак, прекумерна работа.

Во такви ситуации, најчесто посегнуваат  по „лоша“ храна, мислејќи си дека таа ќе им ја пружи потребната утеха. Меѓутоа, на крајот се чувствуваат уште полошо.

Затоа е важно да бидете потполно свесни за проблемот. Ако сте од оние што стресот го побиваат со килограмски пакувања сладолед, или, пак, хамбургер, добро преиспитајте се пред оброкот.

Оценете го чувството на глад од 1 до 10, советуваат диететичарите, а јадете само тогаш кога гладта ќе досегне до 7 или 8. Јадете додека не се заситите, или приближно стигнете до 3-4 на вашата скала.

Во сите други случаи, наместо храна, јавете им се на пријателите, излезете да прошетате, пуштете ја омилената музика, или, пак, погледнете некој добар филм.

Правете го сето она благодарение на кое среќата ќе ја замени тагата. 

2. Глад заради лоша храна

Две нешта мора задолжително да ги знаете.

Кога оброците не ви се доволно заситувачки, односно не ја содржат задоволителната количина на протеини, здрави масти и прости јаглехидрати, бидете сигурни дека по консумација на истите, набрзо ќе посакате и нешто слатко.

Што повеќе јадете слатко, пак, толку повеќе организмот ќе има „потреба“ од него, како и обратно. Гладта настанува поради ткн. „празни калории“, односно внесот на висококалорична храна со слаба нутритивна вредност.

Затоа, нека секој ваш оброк ја содржи потребната количина на хранливи материи, како би ги избегнале сценаријата што ви штетат на линијата.

3. Глад од недостаток на сон

Тешко е прецизно да ја процените гладта, или, пак, ситоста, доколку сте хронично ненаспани. Тогаш уморот си „поигрува“ со вашите хормони.

Недостатокот на сон привидно ве прави гладни. Предизвикува пораст на хормонот грелин, кој го стимулира апетитот, двојно зголемувајќи ја желбата за храна.

Воедно, го намалува производството на лептин, хормонот кој го предупредува мозокот дека сте најадени, односно е задолжен за чувството на ситост.

Спијте доволно!

4. Глад поради жед

Веројатно и самите повеќепати сте слушнале дека жедта може да се манифестира како лажна глад.

Затоа, наместо брз меѓуоброк, ставете ја фантомската глад пред искушение. Напијте се чаша вода и прошетајте.

Доколку потребата за храна не ја снема ни после некое време, тогаш вашата глад е вистинска.

Впрочем, со таквиот трик ќе почнете да пиете поголема количина на вода, што е и повеќе од пожелно и препорачливо. Притоа, ќе ја спречите жедта да ве залажува дека сте гладни.

М. А. | Црнобело